ഒട്ടാവ: ചന്ദ്രനിലേക്കുള്ള ചരിത്രപരമായ ആർട്ടെമിസ് II ദൗത്യത്തിൽ പങ്കെടുക്കുന്ന ആദ്യ കനേഡിയൻ ബഹിരാകാശ സഞ്ചാരി ജെറമി ഹാൻസനെ ആദരിച്ചുകൊണ്ട് റോയൽ കാനേഡിയൻ മിന്റ് പുതിയ കളക്ടർ കോയിൻ പുറത്തിറക്കി. നാസയുടെ ഈ ദൗത്യത്തിലൂടെ ചന്ദ്രനെ വലംവയ്ക്കുന്ന ആദ്യ കനേഡിയൻ എന്ന ഖ്യാതി ജെറമി ഹാൻസൻ സ്വന്തമാക്കുന്ന പശ്ചാത്തലത്തിലാണ് ഈ നടപടി. കാനഡയും അമേരിക്കയും മാത്രമാണ് നിലവിൽ ബഹിരാകാശത്തിന്റെ ആഴങ്ങളിലേക്ക് മനുഷ്യനെ അയച്ച രാജ്യങ്ങൾ എന്ന പ്രത്യേകതയും ഈ ദൗത്യത്തിനുണ്ട്.
കനേഡിയൻ കലാകാരി പാണ്ടോറ യംഗ് രൂപകൽപ്പന ചെയ്ത ഈ 20 ഡോളർ വെള്ളി നാണയം 99.99 ശതമാനം ശുദ്ധമായ വെള്ളിയിലാണ് നിർമ്മിച്ചിരിക്കുന്നത്. ബ്ലാക്ക്ലൈറ്റ് സാങ്കേതികവിദ്യ ഉപയോഗിച്ചിട്ടുള്ള ഈ നാണയത്തിന്റെ ഒരു വശത്ത് ഓറിയോൺ ക്രൂ സർവൈവൽ സിസ്റ്റം സ്പേസ് സ്യൂട്ട് ധരിച്ച ജെറമി ഹാൻസന്റെ ചിത്രമാണുള്ളത്. സ്പേസ് സ്യൂട്ടിലെ റോയൽ കനേഡിയൻ എയർഫോഴ്സ് ബാഡ്ജും കനേഡിയൻ ബഹിരാകാശ ഏജൻസിയുടെ പാച്ചും നാണയത്തിൽ വ്യക്തമായി കാണാം. നാണയത്തിന്റെ മറുവശത്ത് കനേഡിയൻ കലാകാരൻ സ്റ്റീവൻ റോസാറ്റി തയ്യാറാക്കിയ ചാൾസ് മൂന്നാമൻ രാജാവിന്റെ ചിത്രമാണുള്ളത്.
ഈ നാണയത്തിന്റെ ഏറ്റവും വലിയ പ്രത്യേകത ഇതിൽ ഉപയോഗിച്ചിരിക്കുന്ന അത്യാധുനിക സാങ്കേതികവിദ്യയാണ്. ബ്ലാക്ക്ലൈറ്റ് വെളിച്ചത്തിൽ നാണയത്തിലെ ചന്ദ്രന്റെ ചിത്രം തിളങ്ങുകയും, യാത്രികന്റെ ഹെൽമെറ്റിലെ വൈസറിനുള്ളിൽ ചന്ദ്രനിൽ നിന്നുള്ള ഭൂമിയുടെ ദൃശ്യം തെളിയുകയും ചെയ്യും. നിലവിൽ 279.95 ഡോളറാണ് ഈ നാണയത്തിന്റെ വില. ആഗോളതലത്തിൽ വെറും 7,500 നാണയങ്ങൾ മാത്രമാണ് വിപണിയിലിറക്കിയിട്ടുള്ളത്. ശേഖരണ താല്പര്യമുള്ളവർക്ക് റോയൽ കാനേഡിയൻ മിന്റ് വെബ്സൈറ്റ് വഴിയോ ഒട്ടാവയിലെയും വിന്നിപെഗിലെയും ഔദ്യോഗിക ബുട്ടീക്കുകൾ വഴിയോ ഇത് സ്വന്തമാക്കാവുന്നതാണ്.
ഏപ്രിൽ ഒന്നിന് വിക്ഷേപിച്ച ആർട്ടെമിസ് II ദൗത്യം 10 ദിവസം നീണ്ടുനിൽക്കുന്ന ഒന്നാണ്. 1972-ലെ അപ്പോളോ ദൗത്യത്തിന് ശേഷം ആദ്യമായാണ് മനുഷ്യൻ ചന്ദ്രനെ വലംവച്ച് ഭൂമിയിലേക്ക് മടങ്ങുന്നത്. കമാൻഡർ റീഡ് വൈസ്മാൻ, പൈലറ്റ് വിക്ടർ ഗ്ലോവർ, മിഷൻ സ്പെഷ്യലിസ്റ്റ് ക്രിസ്റ്റീന കോക്ക് എന്നിവർക്കൊപ്പം മിഷൻ സ്പെഷ്യലിസ്റ്റായാണ് ജെറമി ഹാൻസൻ ഈ ദൗത്യത്തിൽ പങ്കെടുക്കുന്നത്. കാനഡയുടെ ബഹിരാകാശ പര്യവേക്ഷണ ചരിത്രത്തിലെ സുപ്രധാന നാഴികക്കല്ലായി ഈ ദൗത്യവും അത് പ്രമാണിച്ച് പുറത്തിറക്കിയ നാണയവും മാറും.
