ഉയർന്ന ജീവിതച്ചെലവിൽ വലയുന്ന കനേഡിയൻ പൗരന്മാർക്ക് ആശ്വാസമായി കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റ് (CGEB) ജൂലൈ മൂന്ന് മുതൽ വിതരണം ചെയ്യും. പഴയ GST/HST ക്രെഡിറ്റിന് പകരമായി അവതരിപ്പിച്ച കാനഡ ഗ്രോസറീസ് ബെനഫിറ്റ് 25% വർധനയോടെയാണ് അക്കൗണ്ടിലേക്ക് എത്തുന്നത്. യോഗ്യരായ എല്ലാ കനേഡിയൻ പൗരന്മാർക്കും 2031 വരെ കാനഡ ഗ്രോസറീസ് ബെനഫിറ്റ് ലഭിക്കും.
CGEB ലഭിക്കുന്നതിന് പ്രത്യേക അപേക്ഷ നൽകേണ്ടതില്ല. 2025-ലെ ആദായനികുതി റിട്ടേൺ സമർപ്പിച്ചതിന്റെ അടിസ്ഥാനത്തിലായിരിക്കും കാനഡ റെവന്യൂ ഏജൻസി (CRA) തുക നിശ്ചയിക്കുക. കുടുംബ വരുമാനം. അംഗങ്ങളുടെ എണ്ണം എന്നിവ അനുസരിച്ച് ഓരോരുത്തർക്കും ലഭിക്കുന്ന തുകയിൽ വ്യത്യാസമുണ്ടായിരിക്കും. ഒറ്റയ്ക്ക് താമസിക്കുന്ന ഒരാൾക്ക് പരമാവധി 679 ഡോളറും, രണ്ട് കുട്ടികളുള്ള കുടുംബത്തിന് 1,358 ഡോളറും, നാല് കുട്ടികളുള്ള കുടുംബത്തിന് 1,826 ഡോളർ വരെയും വാർഷിക ആനുകൂല്യമായി ലഭിക്കും. ജൂലൈ 3, ഒക്ടോബർ 5, ജനുവരി 5, ഏപ്രിൽ 7 എന്നീ തീയതികളിലാണ് കാനഡ ഗ്രോസറീസ് ആൻഡ് എസൻഷ്യൽസ് ബെനഫിറ്റ് വിതരണം ചെയ്യുന്നത്.
