ഓട്ടവ: പൂപ്പൽ ബാധയെത്തുടർന്ന് കുട്ടികളുടെ സ്നോസ്യൂട്ടുകൾ തിരിച്ചുവിളിച്ച് കനേഡിയൻ ഔട്ട്ഡോർ ഗിയർ കമ്പനി. 2024 ഓഗസ്റ്റ് മുതൽ ഡിസംബർ വരെ കാനഡയിൽ വിറ്റഴിച്ച 3,200 ഓളം ടോസ്റ്റർ, ടോസ്റ്റർ ബണ്ടിംഗ് സ്യൂട്ടുകളാണ് തിരിച്ചുവിളിച്ചതെന്ന് മൗണ്ടൻ എക്യുപ്മെന്റ് കമ്പനി (എംഇസി) അറിയിച്ചു. ഇൻസുലേറ്റ് ചെയ്തതും ഡ്യുവൽ ഫ്രണ്ട് സിപ്പറുകളുള്ളതുമായ വാട്ടർപ്രൂഫ് വൺ-പീസ് സ്യൂട്ടുകളിൽ ചിലതിലാണ് പൂപ്പൽ അടങ്ങിയിരിക്കുന്നതായി കണ്ടെത്തിയതെന്ന് ഹെൽത്ത് കാനഡ പറയുന്നു. ശ്വാസകോശ സംബന്ധമായ അസുഖങ്ങൾക്കും അലർജികൾക്കും പൂപ്പൽ ബാധ കാരണമാകുമെന്ന് ഏജൻസി കൂട്ടിച്ചേർത്തു. ആരോഗ്യപ്രശ്നങ്ങളുമായി ബന്ധപ്പെട്ട രണ്ട് റിപ്പോർട്ടുകൾ ലഭിച്ചതായും, എന്നാൽ ഈ രോഗങ്ങൾക്ക് പൂപ്പൽ ബാധയുമായി ബന്ധമുണ്ടോ എന്ന് കമ്പനി സ്ഥിരീകരിച്ചിട്ടില്ലെന്നും എംഇസി പറഞ്ഞു.
മൂന്ന് മുതൽ ഏഴ് വയസ്സ് വരെ പ്രായമുള്ള കുട്ടികളുടെ, സാൽമൺബെറി, പർപ്പിൾ ഓർക്കിഡ്, സമ്മിറ്റ്, ബ്ലാക്ക് പിഡബ്ല്യു, ഡാർക്ക് ഫോറസ്റ്റ് മൗണ്ടൻ സ്നോ തുടങ്ങിയ നിറങ്ങളിൽ ലഭ്യമായിരുന്ന ടോസ്റ്റർ സ്യൂട്ടുകളാണ് തിരിച്ചുവിളിച്ചത്. അതേസമയം, ആറ് മുതൽ 24 മാസം വരെ പ്രായമുള്ള കുട്ടികളുടെ സമ്മിറ്റ് വിന്റർ ക്രിട്ടേഴ്സ്, സാൽമൺബെറി, വൈൽഡ് ബെറി, എർത്തൻ ഗോൾഡ് എന്നീ നിറങ്ങളിൽ ഇറക്കിയ ടോസ്റ്റർ ബണ്ടിംഗ് സ്യൂട്ടും തിരിച്ചു വിളിച്ചവയിൽ ഉൾപ്പെടുന്നു. 666483, 666503 എന്നീ പിഒ നമ്പറുകളുള്ള സ്യൂട്ടുകൾ മാത്രമേ തിരിച്ചുവിളിക്കലിൽ ഉൾപ്പെടുത്തിയിട്ടുള്ളൂ. സ്യൂട്ടുകളിലെ ഉൽപ്പന്ന ടാഗിൽ ഉപഭോക്താക്കൾക്ക് PO നമ്പർ കണ്ടെത്താൻ കഴിയും. ബാധിക്കപ്പെട്ട സ്നോസ്യൂട്ടുകൾ ഉപയോഗിക്കുന്നത് ഉടൻ നിർത്താനും റീഫണ്ട്, കൈമാറ്റം എന്നിവയ്ക്കായി ഏതെങ്കിലും MEC റീട്ടെയിൽ സ്റ്റോറിനെ ബന്ധപ്പെടാനും കമ്പനി ഉപഭോക്താക്കളോട് അഭ്യർത്ഥിച്ചു.
