ആൽബർട്ട കാനഡയിൽ നിന്ന് വേർപിരിയുന്നതുമായി ബന്ധപ്പെട്ട റഫറണ്ടം ശക്തമാകുന്നതിനിടെ, പ്രവിശ്യയുടെ വികസനവും ദേശീയ ഐക്യവും മുൻനിർത്തിയുള്ള പുതിയ ഊർജ നയങ്ങൾ പ്രധാനമന്ത്രി മാർക്ക് കാർണി പ്രഖ്യാപിച്ചു. കാനഡയുടെ വൈദ്യുതി ഗ്രിഡ് വികസനം വേഗത്തിലാക്കാനും കൂടുതൽ പ്രകൃതി വാതക ടർബൈനുകൾ സ്ഥാപിക്കാനുമുള്ള പദ്ധതികളാണ് പ്രധാനമന്ത്രിയുടെ പുതിയ പ്രഖ്യാപനത്തിലുള്ളത്. വർഷങ്ങളായി ഊർജ പദ്ധതികൾ തടസ്സപ്പെട്ടതിനെ തുടർന്ന് ആൽബർട്ടയുമായി നിലനിൽക്കുന്ന ഭിന്നതകൾ പരിഹരിക്കാനും പ്രവിശ്യയെ രാജ്യത്തിനൊപ്പം ചേർത്തുനിർത്താനുമുള്ള രാഷ്ട്രീയ നീക്കമായാണ് ഈ പ്രഖ്യാപനം വിലയിരുത്തപ്പെടുന്നത്.
മുൻ ലിബറൽ സർക്കാരിന്റെ കർശനമായ കാലാവസ്ഥാ-കാർബൺ നിയന്ത്രണ നയങ്ങളിൽ നിന്നുള്ള വലിയൊരു മാറ്റമാണ് പുതിയ ഊർജ പ്രഖ്യാപനം വഴിയൊരുക്കുന്നത്. ഫോസിൽ ഇന്ധന സമ്പന്നമായ ആൽബർട്ട, സസ്കാച്ചെവൻ എന്നീ പ്രവിശ്യകളുടെ ശക്തമായ എതിർപ്പിനെത്തുടർന്നാണ് ഫെഡറൽ സർക്കാർ നയങ്ങളിൽ അയവ് വരുത്താൻ തയ്യാറായത്. ഇതിന്റെ തുടർച്ചയായി, കാർബൺ നികുതി വ്യവസ്ഥകളിൽ വരുത്തേണ്ട മാറ്റങ്ങളെക്കുറിച്ച് ആൽബർട്ട പ്രീമിയർ ഡാനിയേൽ സ്മിത്തുമായി പ്രധാനമന്ത്രി ചർച്ച നടത്തും. ഈ ചർച്ച പസഫിക് തീരത്തേക്കുള്ള പുതിയ എണ്ണ പൈപ്പ്ലൈൻ പദ്ധതിക്ക് അനുമതി നൽകുന്നതിലേക്ക് വഴിതുറക്കുമെന്നാണ് ഔദ്യോഗിക വൃത്തങ്ങൾ നൽകുന്ന സൂചന.
