കാനഡയുടെ മത്സരം ഒഴിവാക്കി യുഎസ്എ–പാരാഗ്വായ് മത്സരം കാണാൻ എത്തിയ മുൻ കനേഡിയൻ പ്രധാനമന്ത്രി ജസ്റ്റിൻ ട്രൂഡോയ്ക്കെതിരെ രൂക്ഷവിമർശനം. ടൊറൻ്റോ സ്റ്റേഡിയത്തിൽ നടന്ന കാനഡ-ബോസ്നിയ മത്സരം കാണാതെ യുഎസിന്റെ മത്സരം കാണാൻ അമേരിക്കൻ പോപ് ഗായികയായ കാമുകി കാറ്റി പെറിക്കൊപ്പം എത്തിയതാണ് ട്രൂഡോയ്ക്കെതിരെ വിമർശനം ഉയരാൻ കാരണം. സോഷ്യൽ മീഡിയയിൽ അടക്കം ട്രൂഡോയ്ക്കെതിരെ കടുത്ത വിമർശനങ്ങളാണ് ഉയരുന്നത്.
അതേസമയം, സമൂഹമാധ്യമങ്ങളിലെ വിമർശനങ്ങൾക്ക് മറുപടിയുമായി ജസ്റ്റിൻ ട്രൂഡോ രംഗത്തെത്തിയിട്ടുണ്ട്. ‘ചിലപ്പോഴൊക്കെ ഉത്തരവാദിത്വമുള്ള ഒരു കാമുകന്റെ കടമകൾ നിറവേറ്റേണ്ടതായിവരും. പക്ഷേ കപ്പ് എടുക്കാൻ ഞാൻ ആരെയാണ് പിന്തുണയ്ക്കുന്നതെന്ന് നിങ്ങൾക്കറിയാം.’’– എക്സിൽ പങ്കുവച്ച ഈ കുറിപ്പിലൂടെയാണ് ട്രൂഡോ വിമർശനങ്ങളെ നേരിട്ടത്. ജസ്റ്റിൻ ട്രൂഡോയും കാറ്റി പെറിയും തമ്മിലുള്ള ബന്ധത്തെക്കുറിച്ച് കഴിഞ്ഞ വർഷം മുതൽ അഭ്യൂഹങ്ങൾ ഉയർന്നെങ്കിലും ഇതാദ്യമായാണ് ട്രൂഡോ വ്യക്തമായി പ്രതികരിക്കുന്നത്. ഒട്ടേറെ പൊതുവേദികളിൽ ഇരുവരും ഒന്നിച്ചെത്തിയിരുന്നെങ്കിലും ബന്ധത്തെക്കുറിച്ച് തുറന്നുപറഞ്ഞിരുന്നില്ല.
