ടെഹ്റാൻ: ഹോർമുസ് കടലിടുക്കിന് സമീപം യുഎസിന്റെ അത്യാധുനിക എം.ക്യു-9 (MQ-9) ഡ്രോൺ വെടിവെച്ചിട്ടത് തദ്ദേശീയമായി നിർമ്മിച്ച പുതിയ വ്യോമപ്രതിരോധ സംവിധാനം ഉപയോഗിച്ചാണെന്ന് ഇറാൻ വെളിപ്പെടുത്തി. അന്താരാഷ്ട്ര വിപണിയിൽ 16 ദശലക്ഷം മുതൽ 30 ദശലക്ഷം ഡോളർ വരെ വിലമതിക്കുന്നതാണ് തകർക്കപ്പെട്ട ഈ അമേരിക്കൻ ഡ്രോൺ. ‘ആരാഷ് ഇ കമാൻഗീർ’ എന്ന അത്യാധുനിക സംവിധാനമാണ് ഇതിനായി ഉപയോഗിച്ചതെന്ന് ഇറാന്റെ ഔദ്യോഗിക മാധ്യമങ്ങൾ സ്ഥിരീകരിച്ചു.
പേർഷ്യൻ പുരാണത്തിലെ പ്രശസ്തനായ അമ്പെയ്ത്തുകാരൻ ‘ആരാഷ് ദി ആർച്ചർ’ എന്ന ഐതിഹാസിക കഥാപാത്രത്തിന്റെ പേരാണ് ഈ പ്രതിരോധ സംവിധാനത്തിന് നൽകിയിരിക്കുന്നത്. ഇറാന്റെ അവകാശവാദം ശരിയാണെങ്കിൽ, ഈ മാരകായുധം ഒരു യഥാർത്ഥ യുദ്ധസാഹചര്യത്തിൽ ആദ്യമായാണ് രാജ്യം പരീക്ഷിക്കുന്നത്. ഇറാന്റെ പക്കൽ ലോകത്തെ ഞെട്ടിക്കുന്ന അത്യാധുനിക ആയുധശേഖരമുണ്ടെന്നതിന്റെ തെളിവാണ് ഈ നടപടിയെന്ന് പ്രതിരോധ മേഖലയിലെ വിദഗ്ദ്ധർ വിലയിരുത്തുന്നു.
രാജ്യത്തിന്റെ വ്യോമ-സമുദ്ര അതിർത്തികൾ സംരക്ഷിക്കുന്നതിനുള്ള പ്രത്യേക സൈനിക നീക്കത്തിനിടയിലാണ് അമേരിക്കൻ ഡ്രോൺ തകർത്തതെന്ന് ഇറാൻ മാധ്യമങ്ങൾ വ്യക്തമാക്കി. അതിതീവ്ര രഹസ്യശേഷിയുള്ള സാങ്കേതികവിദ്യയാണ് ഡ്രോൺ വീഴ്ത്താൻ ഉപയോഗിച്ചതെന്ന് ഇറാന്റെ ഫാർസ് വാർത്താ ഏജൻസിയും റിപ്പോർട്ട് ചെയ്തു. അതേസമയം, ഇറാന്റെ ഈ വൻ അവകാശവാദത്തോട് അമേരിക്ക ഉൾപ്പെടെയുള്ള മറ്റ് വിദേശരാജ്യങ്ങൾ ഇതുവരെ ഔദ്യോഗികമായി പ്രതികരിച്ചിട്ടില്ല.
