കാനഡയിൽ ഡ്യൂട്ടിക്കിടെയുണ്ടായ വാഹനാപകടത്തിൽ ഇന്ത്യൻ വംശജനായ പോലീസ് ഉദ്യോഗസ്ഥൻ കൊല്ലപ്പെട്ട സംഭവത്തിൽ യുവാവിനെ അറസ്റ്റ് ചെയ്തു. ഒൻ്റാരിയോ പ്രൊവിൻഷ്യൽ പോലീസ് (OPP) കോൺസ്റ്റബിളായ തരുൺ ബാലി (29) ആണ് മരിച്ചത്. വടക്കൻ ഒൻ്റാരിയോയിലെ ഹേർസ്റ്റ് എന്ന ചെറുപട്ടണത്തിൽ ചൊവ്വാഴ്ച ഉച്ചകഴിഞ്ഞായിരുന്നു അപകടം. തുടർന്ന് നടന്ന അന്വേഷണത്തിൽ വാഹനാപകടത്തിന് കാരണക്കാരനായ പതിനെട്ട് വയസ്സുള്ള യുവാവിനെ അറസ്റ്റ് ചെയ്തതായി OPP അറിയിച്ചു. കേസ് അന്വേഷണത്തിനിടെ തരുൺ ബാലിയെ പ്രതി ഓടിച്ച വാഹനം ഇടിച്ചുതെറിപ്പിക്കുകയായിരുന്നു. അപകടത്തിന് ശേഷം നിർത്താതെ പോയ വാഹനത്തെ പിന്തുടർന്ന പോലീസ് പ്രതിയെ പിടികൂടുകയായിരുന്നു. അറസ്റ്റിലായ യുവാവിനെതിരെ കൊലപാതകം, അശ്രദ്ധമായി വാഹനമോടിക്കൽ, പോലീസിൽ നിന്ന് രക്ഷപ്പെടാൻ ശ്രമിക്കൽ എന്നീ കുറ്റങ്ങൾ ചുമത്തി.
രണ്ടര വർഷമായി ഒൻ്റാരിയോ പ്രൊവിൻഷ്യൽ പോലീസിൽ സേവനമനുഷ്ഠിക്കുന്ന തരുൺ ബാലി സെൻട്രൽ ഒൻ്റാരിയോയിലെ ഡഫറിൻ മേഖലയിലായിരുന്നു ജോലി ചെയ്തിരുന്നത്. എന്നാൽ, താൽക്കാലിക ചുമതലയുടെ ഭാഗമായി ജെയിംസ് ബേ മേഖലയിലേക്ക് മാറ്റിയപ്പോഴാണ് ഈ ദുരന്തം സംഭവിച്ചത്.
