ഉഷ്ണമേഖലാ കൊടുങ്കാറ്റായ റേച്ചലിനെ തുടര്‍ന്ന് നെവാഡയില്‍ കനത്ത വെള്ളപ്പൊക്കം. യുഎസിന്‍റെ തെക്കുപടിഞ്ഞാറന്‍ മേഖലയില്‍ ശക്തമായ മഴയ്ക്കും ഒറ്റപ്പെട്ട ഇടിമിന്നലിനും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി. തിങ്കളാഴ്ചയും വിവിധ പ്രദേശങ്ങളില്‍ വെള്ളപ്പൊക്ക ജാഗ്രതാ നിർദ്ദേശം നൽകിയിരുന്നു. വാരാന്ത്യത്തില്‍ ലാസ് വേഗസിലുണ്ടായ കനത്ത മഴയെ തുടര്‍ന്ന് റോഡുകളിലും താഴ്ന്ന പ്രദേശങ്ങളിലും വെള്ളം കയറി. ലാസ് വേഗസ് നഗരത്തിൽ ഞായറാഴ്ച രാവിലെ വരെയുള്ള 24 മണിക്കൂറിനിടെ 1.08 ഇഞ്ച് മഴയാണ് ലഭിച്ചത്.
റേച്ചല്‍ കൊടുങ്കാറ്റിന്‍റെ ഏറ്റവും ശക്തമായ ആഘാതം പിന്നിട്ടെങ്കിലും പ്രദേശത്ത് കാലാവസ്ഥാ വ്യതിയാനങ്ങള്‍ തുടരുന്നതിനാല്‍ പെട്ടെന്നുള്ള വെള്ളപ്പൊക്കത്തിന് സാധ്യതയുണ്ടെന്ന് കാലാവസ്ഥാ നിരീക്ഷകർ അറിയിച്ചു. യൂട്ട, തെക്കുകിഴക്കന്‍ ഐഡഹോ, അരിസോനയുടെ വടക്കന്‍-മധ്യ മേഖലകള്‍ എന്നിവിടങ്ങളില്‍ തിങ്കളാഴ്ച ഉച്ചവരെ പ്രളയജാഗ്രതാ നിര്‍ദേശം നിലവിലുണ്ടായിരുന്നു. ഗ്രാന്‍ഡ് കാന്യണ്‍ പ്രദേശവും മുന്നറിയിപ്പിന്‍റെ പരിധിയില്‍ ഉള്‍പ്പെടുന്നു. വരാനിരിക്കുന്ന മഴ റേച്ചലിന്‍റെ ശേഷിപ്പുകള്‍ മൂലമല്ലെന്നും പടിഞ്ഞാറന്‍ യുഎസിലൂടെ നീങ്ങുന്ന മറ്റൊരു കാലാവസ്ഥാ സംവിധാനത്തിന്‍റെ ഫലമാണെന്നും അധികൃതര്‍ വ്യക്തമാക്കി. ബുധനാഴ്ചയോടെ മഴ അവസാനിക്കുമെന്നാണ് പ്രവചനം.
ഫ്ലോറിഡയിലെ പാന്‍ഹാന്‍ഡില്‍ മേഖലയിലും തെക്കന്‍ അലബാമയിലുമായി തിങ്കളാഴ്ച രാവിലെ ഏകദേശം 1.58 ലക്ഷം വൈദ്യുതി ഉപയോക്താക്കള്‍ വൈദ്യുതി തകരാർ നേരിട്ടിരുന്നു. ചൊവ്വാഴ്ച രാത്രിയോടെ മിക്കയിടങ്ങളിലും വൈദ്യുതി പുനഃസ്ഥാപിക്കാനാകുമെന്ന് ഫ്ലോറിഡ ഗവര്‍ണര്‍ റോണ്‍ ഡിസാൻ്റിസ് അറിയിച്ചു. അതേസമയം, മധ്യ അറ്റ്‌ലാൻ്റിക് മേഖല മുതല്‍ തെക്കുകിഴക്കന്‍ യുഎസ് വരെയും തെക്കന്‍ അപ്പലേച്ചിയന്‍ പര്‍വതപ്രദേശങ്ങളിലും വരും ദിവസങ്ങളില്‍ വരണ്ട കാലാവസ്ഥ പ്രതീക്ഷിക്കുന്നു. ചില പ്രദേശങ്ങളില്‍ സാധാരണയെക്കാള്‍ ഉയര്‍ന്ന താപനില അനുഭവപ്പെടുന്നതിനാല്‍ വേനല്‍ക്കാലത്തിന് സമാനമായ ചൂട് അനുഭവപ്പെടുമെന്നും കാലാവസ്ഥാ നിരീക്ഷകര്‍ അറിയിച്ചു.
