ആല്‍ബര്‍ട്ടയിലുടനീളം ഉഷ്ണതരംഗ മുന്നറിയിപ്പ് പുറപ്പെടുവിച്ച് എന്‍വയണ്‍മെന്റ് കാനഡ. വരും ദിവസങ്ങളില്‍ പകല്‍ സമയത്തെ ഉയര്‍ന്ന താപനില 29-33 ഡിഗ്രി സെല്‍ഷ്യസ് വരെ അനുഭവപ്പെടാമെന്ന് കാലാവസ്ഥാ ഏജന്‍സി പറയുന്നു.
പ്രവിശ്യയുടെ മധ്യ, വടക്കന്‍ പ്രദേശങ്ങളില്‍ ഇതിനകം തന്നെ ഉയര്‍ന്ന താപനില അനുഭവപ്പെടുന്നുണ്ട്. അതേസമയം കാല്‍ഗറി ഉള്‍പ്പെടെയുള്ള തെക്കന്‍ ആല്‍ബര്‍ട്ടയില്‍ തിങ്കളാഴ്ച മുതല്‍ കനത്ത ചൂട് അനുഭവപ്പെടുമെന്ന് പ്രതീക്ഷിക്കുന്നു. കാല്‍ഗറിയില്‍ ഞായറാഴ്ച ഉയര്‍ന്ന താപനില 27 ഡിഗ്രി സെല്‍ഷ്യസും,തിങ്കളാഴ്ച 25 ഡിഗ്രി സെല്‍ഷ്യസും,ചൊവ്വാഴ്ച താപനില 30 ഡിഗ്രി സെല്‍ഷ്യസും ആയിരിക്കുമെന്ന് പ്രതീക്ഷിക്കുന്നതായി കാലാവസ്ഥാ ഏജന്‍സി പറഞ്ഞു. മറ്റുള്ള ദിവങ്ങളിലെ താപനില 26-30 ഡിഗ്രി സെല്‍ഷ്യസായിരിക്കും.
കനത്ത ചൂട് കാരണം തലവേദന, ഓക്കാനം, തലകറക്കം, തീവ്രമായ ക്ഷീണം എന്നിവ അനുഭവപ്പെടാം. കടുത്ത ചൂടിനെ പ്രതിരോധിക്കാന്‍, ദാഹം തോന്നുന്നതിനു മുമ്പുതന്നെ ധാരാളം വെള്ളം കുടിക്കുക, നിര്‍ജ്ജലീകരണ സാധ്യത കുറയ്ക്കുക തുടങ്ങിയ നിര്‍ദ്ദേശങ്ങളും എന്‍വയണ്‍മെന്റ് കാനഡനല്‍കിയിട്ടുണ്ട്.
