വൈസ് മെൻ ഇന്റർനാഷണൽ യുഎസ് ഏരിയ കൗൺസിലിന്റെ 2025-26 വർഷത്തെ മികച്ച റീജനൽ ഡയറക്ടർക്കുള്ള ‘ഹെൻട്രി ഡി. ഗ്രീംസ്’ അവാർഡിന് നോർത്ത് അറ്റ്ലാന്റിക് റീജനൽ ഡയറക്ടർ ജോർജ് കെ. ജോൺ (സന്തോഷ്) തിരഞ്ഞെടുക്കപ്പെട്ടു. 2026 ഓഗസ്റ്റ് 16-ന് നടന്ന കൗൺസിൽ യോഗത്തിലാണ് പുരസ്കാര പ്രഖ്യാപനമുണ്ടായത്. മുൻകാലങ്ങളിലും നോർത്ത് അറ്റ്ലാന്റിക് റീജിയനിലെ ഡയറക്ടർമാർക്ക് ലഭിച്ചിട്ടുള്ള ഈ ചരിത്രപ്രസിദ്ധമായ നേട്ടം കൈവരിച്ചതിലൂടെ മേഖലയുടെ പെരുമയും പാരമ്പര്യവും വീണ്ടും നിലനിർത്താൻ അദ്ദേഹത്തിന് സാധിച്ചു.

വൈസ് മെൻ പ്രസ്ഥാനത്തിനും വൈ.എം.സി.എക്കും അർപ്പിച്ച നിസ്വാർഥ സേവനങ്ങളെ മുൻനിർത്തിയാണ് ഈ പുരസ്കാരം സമ്മാനിക്കുന്നത്. മാസച്യുസെറ്റ്‌സിൽ നിന്നുള്ള പ്രമുഖ അംഗവും വൈ.എം.സി.എ ഹാൾ ഓഫ് ഫെയിമിൽ ഇടംനേടിയ വ്യക്തിയുമായ അന്തരിച്ച ഹെൻട്രി ഡി. ഗ്രീംസിന്റെ ഓർമ്മയ്ക്കായി ഏർപ്പെടുത്തിയതാണ് ഈ അവാർഡ്. ഏകദേശം 19 വർഷത്തോളം ഇന്റർനാഷണൽ സെക്രട്ടറിയായും, തുടർന്ന് സംഘടനയുടെ ആദ്യ ഇന്റർനാഷണൽ സെക്രട്ടറി ജനറലായും സേവനമനുഷ്ഠിച്ച അദ്ദേഹത്തിന്റെ ഓർമ്മകൾ പ്രസ്ഥാനത്തിന് എന്നും വലിയ പ്രചോദനമാണ്.