കനത്ത മഴയിൽ മുങ്ങി കാല്‍ഗറി നഗരം. കാല്‍ഗറിയുടെ പടിഞ്ഞാറ് ഭാഗത്ത് വെള്ളപ്പൊക്ക മുന്നറിയിപ്പുകളും ഒഴിപ്പിക്കല്‍ മുന്നറിയിപ്പുകളും നല്‍കിയിട്ടുണ്ട്. ബോ, എല്‍ബോ നദികളുടെ സമീപത്തു നിന്നും ഒഴിഞ്ഞു നില്‍ക്കണമെന്ന് സിറ്റി അധികൃതർ മുന്നറിയിപ്പ് നല്‍കിയിട്ടുണ്ട്. കൂടാതെ ബ്രാഗ് ക്രീക്ക് മേഖലയിലും കനനാസ്കിസിന്റെ ചില ഭാഗങ്ങളിലും വെള്ളപ്പൊക്കത്തിന് സാധ്യതയുണ്ടെന്ന് മുന്നറിയിപ്പ് നൽകി. ഈ മേഖലയിൽ പ്രാദേശിക അടിയന്തരാവസ്ഥയും പ്രഖ്യാപിച്ചു. കനത്ത മഴയിൽ എൽബോ നദിയിലെ ജലനിരപ്പ് മൂന്ന് മീറ്ററായി ഉയർന്നതായി കാലാവസ്ഥാ നിരീക്ഷകർ അറിയിച്ചു. കൂടാതെ ബോ, എൽബോ നദികളിൽ ബോട്ടിംഗ് നടത്തുകയോ, നീന്തുകയോ ചെയ്യരുതെന്ന് ഫയർ ഡിപ്പാർട്ട്മെൻ്റ് മുന്നറിയിപ്പ് നൽകി.
കനനാസ്കിസിലെ ക്യാമ്പ് ഗ്രൗണ്ടുകള്‍ ഒഴിപ്പിക്കുന്നതിനും നാശനഷ്ടങ്ങള്‍ നിരീക്ഷിക്കുന്നതിനും ആവശ്യമുള്ളിടത്ത് റോഡുകള്‍ അടച്ചിടുന്നതിനും അധികൃതർ രംഗത്ത് എത്തിയിട്ടുണ്ട്. ആളുകൾ യാത്രകൾ ഒഴിവാക്കണമെന്നും നിർദ്ദേശിച്ചിട്ടുണ്ട്. ഹൈവേ 40 അടച്ചതായി അധികൃതർ അറിയിച്ചു. വില്യം വാട്‌സണ്‍ ലോഡ്ജിലും പീറ്റര്‍ ലൗഹീഡ് ഡിസ്‌കവറി സെന്‍ററിലുമായി താല്‍ക്കാലിക ഷെല്‍ട്ടറുകൾ തുറന്നിട്ടുണ്ട്. നിലവിൽ ഇതുവരെ പരുക്കുകളൊന്നും റിപ്പോര്‍ട്ട് ചെയ്തിട്ടില്ല.
