ഫിഫ ലോകകപ്പ് മത്സരങ്ങൾ നടക്കുന്ന ദിവസങ്ങളിൽ പ്രവിശ്യയിലെ സർക്കാർ ജീവനക്കാർക്ക് താൽക്കാലികമായി വർക്ക് ഫ്രം ഹോമിന് അനുമതി നൽകുമെന്ന് ഒൻ്റാരിയോ പ്രീമിയർ ഡഗ് ഫോർഡ് അറിയിച്ചു. ടൊറൻ്റോയിൽ പകൽ സമയത്ത് മത്സരങ്ങൾ നടക്കുന്ന ജൂൺ 12, ജൂൺ 26 തീയതികളിൽ മാത്രമേ ഈ ഇളവ് ബാധകമാകൂ. മാനേജർമാരുടെ അനുമതിയോടെയായിരിക്കും വർക്ക് ഫ്രം ഹോം അനുവദിക്കുക.
ലോകകപ്പ് സമയത്ത് ടൊറൻ്റോ നഗരത്തിൽ വലിയ ഗതാഗതക്കുരുക്കും തിരക്കും ഉണ്ടാകുമെന്ന ആശങ്കയെ തുടർന്ന് സർക്കാർ ജീവനക്കാരുടെ വിവിധ യൂണിയനുകൾ ഏപ്രിലിൽ സർക്കാരിനോട് പ്രത്യേക ഇളവുകൾ ആവശ്യപ്പെട്ടിരുന്നു. ജൂൺ 8 മുതൽ ജൂലൈ 3 വരെ നഗരത്തിലെ എല്ലാ ഒൻ്റാരിയോ പബ്ലിക് സർവീസ് ജീവനക്കാർക്കും താൽക്കാലിക റിമോട്ട് വർക്ക് സൗകര്യം അനുവദിക്കണമെന്നായിരുന്നു യൂണിയനുകളുടെ ആവശ്യം. ഈ ആവശ്യങ്ങൾ പരിഗണിച്ചാണ് ഇളവുകൾ നൽകിയത്.
