മിഷിഗണില് വീടിനു തീപിടിച്ച് ആറ് കുട്ടികളുള്പ്പെടെ ഒരു കുടുംബത്തിലെ എട്ട് പേരെ മരിച്ച നിലയില് കണ്ടെത്തി. അതേസമയം മരിച്ചവരില് ചിലർക്ക് വെടിയേറ്റിട്ടുണ്ടെന്നും അന്വേഷണ ഉദ്യോഗസ്ഥർ അറിയിച്ചു. വെള്ളിയാഴ്ച രാവിലെ മിഷിഗണ് തടാകത്തിന് സമീപമുള്ള ഗ്രാന്ഡ് ഹേവന് ടൗണ്ഷിപ്പിലെ ഒരു വീട്ടിലാണ് സംഭവം.
വെള്ളിയാഴ്ച രാവിലെ ഒരു വീട്ടില് നിന്ന് പുക ഉയരുന്നതായി വിവരം ലഭിച്ചതിനെ തുടര്ന്ന് അഗ്നിശമനസേന സ്ഥലത്തെത്തി. വീടിനുള്ളില് പ്രവേശിച്ച് തീ അണയ്ക്കുന്നതിനിടെയാണ് നിരവധി പേരെ മരിച്ച നിലയില് കണ്ടെത്തിയത്. മരിച്ചവരിൽ അഞ്ച് മുതല് 15 വയസ് വരെ പ്രായമുള്ള ആറ് കുട്ടികളും രണ്ട് മുതിര്ന്നവരും ഉള്പ്പെടുന്നതായി അധികൃതര് അറിയിച്ചു. മരിച്ചവരെല്ലാം ഒരേ കുടുംബാംഗങ്ങളാണെന്നാണ് പ്രാഥമിക നിഗമനം. മരിച്ചവരില് ചിലരുടെ ശരീരത്തില് വെടിയേറ്റ പാടുകള് കണ്ടെത്തിയതായി അന്വേഷണ സംഘം അറിയിച്ചു. എത്ര പേര്ക്ക് വെടിയേറ്റിട്ടുണ്ടെന്നത് ഇതുവരെ വ്യക്തമായിട്ടില്ല. അന്വേഷണം പുരോഗമിക്കുന്നു.
