കാൽഗറി: ആൽബർട്ടയിലെ പർവ്വതനിരകളിൽ കൽക്കരി ഖനനം നിരോധിക്കണമെന്ന് ആവശ്യപ്പെട്ടുള്ള ജനകീയ പ്രക്ഷോഭത്തിന് ഊർജ്ജം പകരാൻ പ്രശസ്ത കൺട്രി മ്യൂസിക് ഗായകൻ കോർബ് ലണ്ട് രംഗത്തെത്തി. പ്രവിശ്യയുടെ കിഴക്കൻ മലനിരകളിലെ ഖനന പ്രവർത്തനങ്ങൾ തടയണമെന്നും കുടിവെള്ള സ്രോതസ്സുകൾ സംരക്ഷിക്കണമെന്നും ആവശ്യപ്പെട്ടുള്ള ബൃഹത്തായ ഒപ്പുശേഖരണ കാമ്പയിനാണ് ശനിയാഴ്ച കാൽഗറിയിൽ നടന്നത്.
‘വാട്ടർ നോട്ട് കോൾ’ (Water Not Coal) എന്ന പേരിൽ നടത്തുന്ന ഈ നിവേദനത്തിന് ആൽബർട്ടയിലെ ചീഫ് ഇലക്ടറൽ ഓഫീസർ ഔദ്യോഗികമായി അനുമതി നൽകിയിട്ടുണ്ട്. ഖനനം വഴി ഭൂഗർഭജലം സെലിനിയം പോലുള്ള മാരകമായ വസ്തുക്കളാൽ മലിനമാകുമെന്നും ഇത് വരുംതലമുറയുടെ ആരോഗ്യത്തെ ബാധിക്കുമെന്നും കോർബ് ലണ്ട് മുന്നറിയിപ്പ് നൽകി. തനിക്ക് രാഷ്ട്രീയ താൽപ്പര്യങ്ങളില്ലെന്നും പ്രകൃതിയെ സംരക്ഷിക്കുക മാത്രമാണ് ലക്ഷ്യമെന്നും അദ്ദേഹം വ്യക്തമാക്കി.
നിവേദനം നിയമസഭയുടെ പരിഗണനയ്ക്ക് എത്തണമെങ്കിൽ ജൂൺ 10-നകം കുറഞ്ഞത് 1,78,000 ഒപ്പുകൾ ശേഖരിക്കേണ്ടതുണ്ട്. നിശ്ചിത എണ്ണം ഒപ്പുകൾ ലഭിച്ചാൽ, ഖനന നിരോധന നിയമം കൊണ്ടുവരുന്ന കാര്യം നിയമസഭ ചർച്ച ചെയ്യുകയോ അല്ലെങ്കിൽ വിഷയം ജനഹിത പരിശോധനയ്ക്ക് വിടുകയോ ചെയ്യും. കാൽഗറിക്ക് ശേഷം ഞായറാഴ്ച എഡ്മന്റണിലും കാമ്പയിൻ തുടരും. നിലവിൽ ആയിരക്കണക്കിന് വോളന്റിയർമാരാണ് പ്രവിശ്യയിലുടനീളം ഒപ്പുശേഖരണത്തിനായി പ്രവർത്തിക്കുന്നത്.
