ഡെമോക്രാറ്റിക് പോരാട്ടം പ്രോഗ്രസ്സീവ് – എസ്റ്റാബ്ലിഷ്‌മെന്റ് സ്ഥാനാർത്ഥികൾ തമ്മിൽ
മിഷിഗൺ പ്രൈമറി തിരഞ്ഞെടുപ്പ് പ്രചാരണത്തിൽ നിന്ന് മല്ലോറി മെക്മോറോ പിന്മാറിയതോടെ, പ്രോഗ്രസ്സീവ് ഡെമോക്രാറ്റിക് സ്ഥാനാർത്ഥിയായ അബ്ദുൾ എൽ-സയീദ് പാർട്ടിയിലെ മുൻനിരക്കാരനായി ഉയർന്നുവന്നിരിക്കുകയാണ്. എല്ലാവർക്കും മെഡിക്കെയർ (Medicare for all) പദ്ധതിയെ പിന്തുണയ്ക്കുന്ന എൽ-സയീദ് വിജയിക്കുകയാണെങ്കിൽ, അമേരിക്കൻ ചരിത്രത്തിലെ ആദ്യത്തെ മുസ്ലിം യുഎസ് സെനറ്ററായി അദ്ദേഹം മാറും. കഴിഞ്ഞ ആഴ്ച അദ്ദേഹത്തെ പിന്തുണച്ച വെർമോണ്ടിൽ നിന്നുള്ള സെനറ്റർ ബെർണി സാൻഡേഴ്സ്, ന്യൂയോർക്ക് കോൺഗ്രസ് വുമൺ അലക്സാണ്ട്രിയ ഒകാസിയോ-കോർട്ടെസ് എന്നിവരുൾപ്പെടെയുള്ള പ്രമുഖ അമേരിക്കൻ ഇടതുപക്ഷ നേതാക്കളുടെ വലിയ പിന്തുണ എൽ-സയീദിനുണ്ട്. ഡെമോക്രാറ്റിക് പാർട്ടിയുടെ ഔദ്യോഗിക നാമനിർദ്ദേശത്തിനായി ഇനി അദ്ദേഹം ഏറ്റുമുട്ടുക ഡെമോക്രാറ്റിക് ‘എസ്റ്റാബ്ലിഷ്‌മെന്റ്’ സ്ഥാനാർത്ഥിയും കോൺഗ്രസ് വുമണുമായ ഹേലി സ്റ്റീവൻസിനോടാണ്.
ഡെമോക്രാറ്റ് നേതാവ് ഗാരി പീറ്റേഴ്സ് ഈ വർഷം ഒഴിയുന്ന സെനറ്റ് സീറ്റ് നിലനിർത്താനായി സെന്റർ-ലെഫ്റ്റ് (മധ്യ-ഇടതുപക്ഷം) നിലപാടുകളുമായി രംഗത്തുണ്ടായിരുന്ന മെക്മോറോയുടെ പിന്മാറ്റം ഈ വിഭാഗത്തിന്റെ പ്രതീക്ഷകൾക്ക് മങ്ങലേൽപ്പിച്ചിട്ടുണ്ട്. ഈ മണ്ഡലത്തിലെ ത്രികോണ മത്സരം തുടക്കത്തിൽ കടുത്തതായിരുന്നുവെങ്കിലും, സമീപകാലത്തെ വോട്ടെടുപ്പ് ഫലങ്ങൾ മെക്മോറോയുടെ ജനപ്രീതി വൻതോതിൽ ഇടിഞ്ഞതായി കാണിച്ചിരുന്നു. ഇതോടെയാണ് സ്റ്റീവൻസിനെയും മറികടന്ന് എൽ-സയീദ് മുന്നിലെത്തിയത്. “ഞാൻ ഈ പ്രചാരണം തൽക്കാലം നിർത്തിവെക്കുകയാണെങ്കിലും പോരാട്ടത്തിൽ നിന്ന് പിന്മാറുന്നില്ല” എന്ന് മെക്മോറോ തന്റെ വീഡിയോ സന്ദേശത്തിലൂടെ വ്യക്തമാക്കി. സാധാരണക്കാർ പോരാട്ടത്തിനിറങ്ങുമ്പോൾ മാറ്റങ്ങൾ സംഭവിക്കുമെന്നും അവർ കൂട്ടിച്ചേർത്തു.
അതേസമയം, മിതവാദി ഡെമോക്രാറ്റായ ഹേലി സ്റ്റീവൻസിന് സെനറ്റ് ഡെമോക്രാറ്റിക് ലീഡർ ചക് ഷുമറിന്റെ പിന്തുണയുണ്ട്. കൂടാതെ ‘സൂപ്പർ പാക്കുകൾ’ (Super PACs) വഴി 16 മില്യൺ ഡോളറിലധികം തുക അവരുടെ പ്രചാരണത്തിനായി ചെലവഴിച്ചിട്ടുമുണ്ട്. ഇസ്രായേലിന് ഒരു ജൂത രാഷ്ട്രമായി നിലനിൽക്കാൻ അവകാശമുണ്ടെന്ന് വ്യക്തമാക്കാൻ എൽ-സയീദ് വിസമ്മതിച്ചതിൽ പ്രകോപിതരായ ‘ഐപാക്’ (AIPAC) പോലുള്ള പ്രോ-ഇസ്രായേൽ സംഘടനകളും സ്റ്റീവൻസിനെയാണ് പിന്തുണയ്ക്കുന്നത്. ഇതേക്കുറിച്ച് കഴിഞ്ഞ ആഴ്ച സിഎൻഎന്നിനോട് സംസാരിച്ച എൽ-സയീദ്, “ഇസ്രായേൽ നിലവിലുണ്ട്, എന്നാൽ നമ്മുടെ പണം സ്വന്തം കുട്ടികളുടെ വളർച്ചയ്ക്കായി നിക്ഷേപിക്കുന്നതിന് പകരം ഇസ്രായേലിലേക്ക് കൂട്ടക്കൊലയ്ക്കും വർണ്ണവിവേചനത്തിനുമായി അയച്ചു കൊടുക്കുന്ന രാഷ്ട്രീയമാണോ നമുക്ക് വേണ്ടതെന്നതാണ് ചോദ്യം” എന്ന് പ്രതികരിച്ചു.
