കാൽഗറി: കാൽഗറി പൊതുതെരഞ്ഞെടുപ്പിന് 4,500 ജീവനക്കാരെ ആവശ്യമുണ്ടെന്ന് ഇലക്ഷൻസ് കാൽഗറി. തെരഞ്ഞെടുപ്പ് പ്രവർത്തകർക്കുള്ള അപേക്ഷകൾ സ്വീകരിക്കാൻ തുടങ്ങി. കാൽഗറിയിലെ മുനിസിപ്പൽ തെരഞ്ഞെടുപ്പിന് രണ്ട് മാസത്തിൽ താഴെ സമയം മാത്രമാണ് ശേഷിക്കുന്നത്. തിരുഞ്ഞെടുപ്പ് പ്രക്രിയ സുഗമമാക്കുന്നതിനായി ആയിരക്കണക്കിന് ആളുകളുടെ ആവശ്യമാണ് ഉള്ളത്.
ജനാധിപത്യ പ്രക്രിയയിൽ താൽപ്പര്യമുള്ള വ്യക്തികളെയാണ് ഇലക്ഷൻസ് കാൽഗറി അന്വേഷിക്കുന്നത്. വോട്ടിംഗ് നീതിയുക്തവും നിയമങ്ങൾ പാലിച്ചുമാണ് നടക്കുന്നതെന്ന് ഉറപ്പാക്കാൻ ഇത്തരം തൊഴിലാളികൾ സഹായിക്കും. തിരഞ്ഞെടുപ്പ് പ്രക്രിയ സുഗമമായി നടപ്പിലാക്കാൻ സഹായിക്കുന്ന ആളുകളെയാണ് തങ്ങൾ അന്വേഷിക്കുന്നതെന്ന് കാൽഗറി നഗരത്തിലെ റിട്ടേണിംഗ് ഓഫീസർ കേറ്റ് മാർട്ടിൻ പറഞ്ഞു. എല്ലാ തിരഞ്ഞെടുപ്പ് പ്രവർത്തക തസ്തികകൾക്കും ശമ്പളം ലഭിക്കും. മുൻകൂർ വോട്ടെടുപ്പിലും തിരഞ്ഞെടുപ്പ് ദിനത്തിലും എല്ലാ നടപടികളും നിറവേറ്റപ്പെടുന്നുണ്ടെന്ന് ഉറപ്പാക്കാൻ അധിക തൊഴിലാളികളെയും നിയമിക്കും.
തെരഞ്ഞെടുപ്പിൽ പ്രവർത്തിക്കാൻ അപേക്ഷിക്കുന്നവർ വ്യക്തികൾ കനേഡിയൻ പൗരന്മാരായിരിക്കണമെന്നില്ല. പക്ഷേ കാനഡയിൽ ജോലി ചെയ്യാൻ യോഗ്യതയുള്ളവരും കുറഞ്ഞത് 16 വയസ്സ് തികഞ്ഞവരുമായിരിക്കണം. സെപ്റ്റംബറിലോ ഒക്ടോബറിലോ പരിശീലന സെഷൻ പൂർത്തിയാക്കാൻ തിരഞ്ഞെടുപ്പ് പ്രവർത്തകർക്ക് കഴിയണം. ടീമിന്റെ ഭാഗമാകാൻ ആഗ്രഹിക്കുന്നവർ electionscalgary.ca/work എന്ന വെബ്സൈറ്റിൽ അപേക്ഷിക്കുക.
