ലോകത്തിലെ ഏറ്റവും വലിയ ഇവി വാഹന നിർമ്മാതാക്കളായ ബിവൈഡി തങ്ങളുടെ ‘ഫ്ലാഷ് ചാർജിങ്’ സാങ്കേതികവിദ്യ കാനഡയിൽ അവതരിപ്പിക്കുന്നു. വെറും 5 മിനിറ്റ് കൊണ്ട് വാഹനങ്ങൾക്ക് 400 കിലോമീറ്റർ വരെ സഞ്ചരിക്കാനുള്ള ചാർജ് നൽകാൻ ശേഷിയുള്ള മെഗാവാട്ട് ക്ലാസ് ചാർജിങ് ശൃംഖലയാണ് ചൈനീസ് കമ്പനി ഒരുക്കിയിരിക്കുന്നത്. നോർത്ത് അമേരിക്കൻ ഭൂഖണ്ഡത്തിൽ ആദ്യമായാണ് ഈ സാങ്കേതികവിദ്യ അവതരിപ്പിക്കുന്നത്.
ബിവൈഡി-യുടെ രണ്ടാം തലമുറ ‘ബ്ലേഡ് ബാറ്ററി’ സാങ്കേതികവിദ്യയും 1000 വോൾട്ട് പ്ലാറ്റ്‌ഫോമും അടിസ്ഥാനമാക്കിയാണ് ഈ സംവിധാനം പ്രവർത്തിക്കുന്നത്. നിലവിൽ നോർത്ത് അമേരിക്കയിലുള്ള ഏറ്റവും വേഗതയേറിയ പബ്ലിക് ചാർജറുകളേക്കാൾ മൂന്നിരട്ടിയിലധികം ശേഷിയുള്ളതാണ് ബിവൈഡി-യുടെ 1,500 കിലോവാട്ട് വരെയുള്ള പുതിയ ചാർജറുകൾ. കാനഡയിലെ കഠിനമായ ശീതകാലാവസ്ഥയിൽ ഇവി ചാർജിങ് വേഗത കുറയുന്ന പ്രതിസന്ധി പരിഹരിക്കാൻ ഈ സാങ്കേതികവിദ്യയ്ക്ക് സാധിക്കുമെന്ന് കമ്പനി അവകാശപ്പെടുന്നു. മൈനസ് 20 ഡിഗ്രി സെൽഷ്യസ് തണുപ്പിലും വെറും അഞ്ച് മിനിറ്റിൽ 10 ശതമാനത്തിൽ നിന്ന് 70 ശതമാനം വരെ ചാർജ് കയറാൻ ഈ സാങ്കേതിക വിദ്യയിലൂടെ സാധിക്കും. ചൈനീസ് ഇലക്ട്രിക് വാഹന ഇറക്കുമതി നികുതി കാനഡ കുറച്ചതോടെ തങ്ങളുടെ ആദ്യ കാറുകൾ നിരത്തിലിറക്കുന്നതിന് മുന്നോടിയായി ശക്തമായ ചാർജിങ് ശൃംഖല സ്വന്തമായി നിർമ്മിക്കാനാണ് ബിവൈഡി ലക്ഷ്യമിടുന്നത്.
