ആഗോളതലത്തിലെ സാമ്പത്തിക അനിശ്ചിതത്വങ്ങൾക്കും ക്രൂഡ് ഓയിൽ വിലയിലെ ചാഞ്ചാട്ടങ്ങൾക്കും ഇടയിൽ, ബാങ്ക് ഓഫ് കാനഡ പലിശനിരക്ക് നിലനിർത്താൻ സാധ്യതയുണ്ടെന്ന് സാമ്പത്തിക വിദഗ്ധർ. ബുധനാഴ്ച നടക്കാനിരിക്കുന്ന നിരക്ക് പ്രഖ്യാപനത്തിൽ സെൻട്രൽ ബാങ്ക് പലിശ നിരക്ക് 2.25 ശതമാനമായി നിലനിർത്തുമെന്നാണ് ഭൂരിപക്ഷം സാമ്പത്തിക വിദഗ്ധരും പ്രവചിക്കുന്നത്.
അതേസമയം മിഡിൽ ഈസ്റ്റ് സംഘർഷവും ഇന്ധനവില വർധനയും കാരണം മെയ് മാസത്തിൽ കാനഡയിലെ പണപ്പെരുപ്പം 3.2 ശതമാനമായി ഉയർന്നത് ബാങ്ക് ഓഫ് കാനഡയ്ക്ക് പലിശനിരക്ക് പ്രഖ്യാപനത്തിൽ വെല്ലുവിളിയാകുന്നുണ്ട്. ഇത് 2023 അവസാനത്തിന് ശേഷമുള്ള ഏറ്റവും ഉയർന്ന നിരക്കാണ്. എന്നാൽ, ആദ്യ പാദത്തിലെ തിരിച്ചടികൾക്ക് ശേഷം കാനഡയുടെ ജിഡിപി ഏപ്രിലിൽ 0.5 ശതമാനം വളർച്ച കൈവരിച്ചിട്ടുണ്ട്. കൂടാതെ തൊഴിൽവിപണി സ്ഥിരത കൈവരിച്ചതും പലിശ നിരക്ക് പ്രഖ്യാപനത്തെ സ്വാധീനിക്കും.
