ന്യൂയോര്ക്ക് ടൈംസ് സ്ക്വയറില് പട്ടാപ്പകല് ഉണ്ടായ കത്തിക്കുത്തില് ബാങ്ക് ഓഫ് അമേരിക്ക വൈസ് പ്രസിഡൻ്റ് എറിന് പിയാസെന്റി (32) കൊല്ലപ്പെട്ടു. തിങ്കളാഴ്ച വൈകുന്നേരം വെസ്റ്റ് 42-ാം സ്ട്രീറ്റ് സെവന്ത് അവന്യൂ പരിസരത്തായിരുന്നു സംഭവം. ന്യൂജഴ്സി ചെസ്റ്റര് സ്വദേശിനിയായ എറിനെ വയറിന് ഗുരുതരമായി കുത്തേറ്റ് ഗുരുതരാവസ്ഥയിൽ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
പമേല സിസ്നെറോസ് (49) എന്ന ക്വീന്സ് സ്വദേശിനിയാണ് ആക്രമണം നടത്തിയതെന്ന് ന്യൂയോര്ക്ക് പോലീസ് അറിയിച്ചു. ആക്രമണങ്ങള് യാതൊരു പ്രകോപനവുമില്ലാതെ യാദൃച്ഛികമായി നടന്നതാണെന്ന് NYPD കമ്മീഷണര് ജെസിക്ക ടിഷ് വ്യക്തമാക്കി. ഇവരെ പോലീസ് വെടിവച്ചിട്ടു. ആക്രമണത്തിനു ശേഷം രണ്ട് കത്തികളുമായി പോലീസിന് നേരെ പാഞ്ഞടുത്ത പമേലയോട് ആയുധങ്ങള് താഴെയിടാന് ഉദ്യോഗസ്ഥര് പലതവണ ആവശ്യപ്പെട്ടു. ടേസര് പ്രയോഗിച്ചിട്ടും ഇവരെ തടയാന് കഴിയാതെ വന്നതോടെ രണ്ട് പോലീസ് ഉദ്യോഗസ്ഥര് വെടിയുതിര്ക്കുകയായിരുന്നു. ഗുരുതരമായി പരിക്കേറ്റ പമേല പിന്നീട് ആശുപത്രിയില് മരിച്ചു.
