എഡ്മന്റൺ: കാനഡയിലെ ആൽബെർട്ട പ്രവിശ്യയിൽ പ്രാഥമിക ആരോഗ്യ ചികിത്സാ രംഗത്ത് വൻ മുന്നേറ്റമെന്ന് സർക്കാർ. പ്രവിശ്യയിൽ കുടുംബ ഡോക്ടർമാരുടെയും നേഴ്സ് പ്രാക്ടീഷണർമാരുടെയും എണ്ണം ചരിത്രത്തിലെ ഏറ്റവും ഉയർന്ന നിലയിൽ എത്തിയതായാണ് ഔദ്യോഗിക കണക്കുകൾ വ്യക്തമാക്കുന്നത്. പ്രവിശ്യയിലെ ആരോഗ്യ സേവനദാതാക്കളെ രോഗികൾക്ക് എളുപ്പത്തിൽ കണ്ടെത്താൻ സഹായിക്കുന്ന പുതിയ വെബ്സൈറ്റും സർക്കാർ പുറത്തിറക്കി.
2025 ഡിസംബർ വരെയുള്ള കണക്കുകൾ പ്രകാരം 6,362 കുടുംബ ഡോക്ടർമാരും 1,137 നേഴ്സ് പ്രാക്ടീഷണർമാരും ആൽബെർട്ടയിൽ സജീവമായി പ്രവർത്തിക്കുന്നുണ്ട്. ഇതിൽ എണ്ണൂറിലധികം ആരോഗ്യ പ്രവർത്തകർ പുതിയ രോഗികളെ സ്വീകരിക്കാൻ സന്നദ്ധരാണെന്നത് ചികിത്സ തേടുന്നവർക്ക് വലിയ ആശ്വാസമാണ്. ഇതിൽ ഭൂരിഭാഗവും കാൽഗറി, എഡ്മന്റൺ മേഖലകളിലാണ്. നിലവിൽ ആൽബെർട്ടയിലെ 84% മുതിർന്നവർക്കും സ്വന്തമായി ഒരു ഫാമിലി ഡോക്ടറോ സ്ഥിരം ആരോഗ്യ സേവനദാതാവോ ഉണ്ടെന്നത് കാനഡയിലെ തന്നെ ഏറ്റവും മികച്ച നിരക്കുകളിൽ ഒന്നാണ്.
ജനങ്ങൾക്കും തങ്ങളുടെ പ്രദേശത്തെ ഡോക്ടർമാരെയും മിഡ്വൈഫുമാരെയും നേഴ്സ് പ്രാക്ടീഷണർമാരെയും വേഗത്തിൽ കണ്ടെത്താൻ സഹായിക്കുന്നതിനായി https://albertafindaprovider.ca/ എന്ന വെബ്സൈറ്റ് കൂടുതൽ സൗകര്യങ്ങളോടെ പുനരാരംഭിച്ചു. പഴയ വെബ്സൈറ്റിനേക്കാൾ വേഗത്തിൽ വിവരങ്ങൾ തിരയാൻ ഇതിൽ സാധിക്കും. കൂടാതെ, പ്രവിശ്യാ ഹെൽത്ത് ഡാഷ്ബോർഡിൽ കാൻസർ പരിശോധനകൾ, തുടർചികിത്സകൾ എന്നിവയുടെ പുരോഗതി നിരീക്ഷിക്കാനുള്ള പുതിയ സംവിധാനവും സുതാര്യത ഉറപ്പാക്കാനായി ഉൾപ്പെടുത്തിയിട്ടുണ്ട്.
പുതിയ ഫണ്ടിംഗ് മാതൃകകളാണ് കൂടുതൽ ഡോക്ടർമാരെ പ്രവിശ്യയിലേക്ക് ആകർഷിക്കാൻ സഹായിച്ചതെന്ന് സർക്കാർ അവകാശപ്പെടുന്നു. എന്നാൽ, ഡോക്ടർമാർക്ക് സർക്കാർ മേഖലയിലും സ്വകാര്യ മേഖലയിലും ഒരേസമയം ജോലി ചെയ്യാൻ അനുവാദം നൽകുന്ന ‘ബിൽ 11’ (Bill 11) നിയമത്തിനെതിരെ വ്യാപകമായ വിമർശനവും ഉയരുന്നുണ്ട്. ഈ നീക്കം കാനഡയുടെ പവിത്രമായ പൊതുജനാരോഗ്യ സംവിധാനത്തെ ദോഷകരമായി ബാധിക്കുമെന്ന് വിവിധ ആരോഗ്യ സംഘടനകൾ ആശങ്ക പ്രകടിപ്പിക്കുന്നു.
