മോൺട്രിയൽ-ട്രൂഡോ അന്താരാഷ്ട്ര വിമാനത്താവളത്തിൽ ലാൻഡ് ചെയ്ത എയർ കാനഡ വിമാനം റൺവേയിൽ നിന്ന് തെന്നിമാറി. വ്യാഴാഴ്ച ഉച്ചകഴിഞ്ഞാണ്‌ സംഭവം. ലോസ് ഏഞ്ചൽസ് അന്താരാഷ്ട്ര വിമാനത്താവളത്തിൽ നിന്നും എത്തിയ AC774 വിമാനം സാധാരണ പോലെ മോൺട്രിയൽ അന്താരാഷ്ട്ര വിമാനത്താവളത്തിൽ ലാൻഡ് ചെയ്തു. തുടർന്ന് റൺവേയിൽ നിന്ന് പുറത്തേക്ക് തെന്നി മാറുകയായിരുന്നു. അപകടത്തെ തുടർന്ന് വിമാത്താവളത്തിലെ നോർത്ത് റൺവേ താൽക്കാലികമായി അടച്ചു.
വിമാനത്തിൽ 156 യാത്രക്കാരും ആറ് ജീവനക്കാരും ഉണ്ടായിരുന്നതായി എയർ കാനഡ വക്താവ് അറിയിച്ചു. എല്ലാ യാത്രക്കാരെയും ജീവനക്കാരെയും സുരക്ഷിതരായി ഇറക്കി. സംഭവത്തെക്കുറിച്ച് അന്വേഷണം ആരംഭിച്ചു. വിമാനം ഹാംഗറിലെത്തിച്ച് പൂർണ്ണ പരിശോധന നടത്തുമെന്ന് എയർലൈൻ അറിയിച്ചു.
