ഓട്ടവ: കാനഡയുടെ പുതിയ ഹോം കെയർ വർക്കർ ഇമിഗ്രേഷൻ പൈലറ്റ് (HCWP) പാത്ത് വേയിലൂടെ സ്ഥിര താമസം (പിആർ) നേടാൻ ആഗ്രഹിക്കുന്ന വിദേശ പൗരന്മാർക്ക് അപേക്ഷകൾ സമർപ്പിക്കാം. മാർച്ച് 31 രാവിലെ പത്ത് മണി മുതൽ അപേക്ഷകൾ സ്വീകരിക്കാൻ ആരംഭിച്ചതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു. ഈ വർഷം HCWP വഴി 2,750 അപേക്ഷകൾ സ്വീകരിക്കുമെന്നും ഐആർസിസി വ്യക്തമാക്കി. കാനഡയ്ക്കുള്ളിൽ നിന്ന് അപേക്ഷിക്കുന്ന വിദേശ ഹോം കെയർ തൊഴിലാളികൾ, വിദേശത്ത് നിന്ന് അപേക്ഷിക്കുന്ന വിദേശ ഹോം കെയർ തൊഴിലാളികൾ എന്നിങ്ങനെ രണ്ടു സ്ട്രീമുകൾ ഉൾക്കൊള്ളുന്നതാണ് ഹോം കെയർ വർക്കർ ഇമിഗ്രേഷൻ പൈലറ്റ്.
ആകെയുള്ള 2,750 അപേക്ഷകളിൽ 150 എണ്ണം നിലവിൽ രാജ്യത്തിന് പുറത്തുള്ള ഹോം കെയർ തൊഴിലാളികൾക്കായി സംവരണം ചെയ്തിട്ടുണ്ട്. എന്നാൽ, കാനഡയ്ക്കുള്ളിൽ നിന്ന് അപേക്ഷിക്കുന്ന വിദേശ ഹോം കെയർ തൊഴിലാളികളുടെ അപേക്ഷകളായിരിക്കും ഐആർസിസി ആദ്യം സ്വീകരിക്കുക. കാനഡയ്ക്ക് പുറത്ത് നിന്ന് അപേക്ഷിക്കുന്ന വിദേശ ഹോം കെയർ തൊഴിലാളികൾക്ക് പിന്നീട് അപേക്ഷിക്കാനുള്ള അവസരം ഉണ്ടായിരിക്കും. എന്നാൽ, ഈ തീയതി ഇമിഗ്രേഷൻ വകുപ്പ് ഇതുവരെ വ്യക്തമാക്കിയിട്ടില്ല. ഈ വർഷത്തെ പരിധി എത്തിക്കഴിഞ്ഞാൽ, അടുത്ത വർഷം പ്രോഗ്രാം വീണ്ടും ആരംഭിക്കുന്നത് വരെ ഐആർസിസി അപേക്ഷകൾ സ്വീകരിക്കുന്നത് നിർത്തും.
