ഗുവാഹത്തി: അസമിൽ വനിതാ ജില്ലാ ഡെപ്യൂട്ടി കമ്മീഷ്ണറുടെ ഫോട്ടോയ്ക്ക് വന്ന കമൻറിൽ ചിരിക്കുന്ന ഇമോജിയിട്ട യുവാവിനെതിരെ കേസ്. കൊക്രാജർ ജില്ലാ ഡെപ്യൂട്ടി കമ്മീഷ്ണറായ വർനാലി ദേക ഫേസ്ബുക്കിൽ പോസ്റ്റ് ചെയ്ത ഫോട്ടോയ്ക്ക് ചുവടെ വന്ന കമന്റിന് പ്രതികരണമായി ചിരിക്കുന്ന ഇമോജിയിട്ട യുവാവിനെതിരെയാണ് പൊലീസ് കേസെടുത്തത്. വർനാലി ദേക മേക്കപ്പ് ഇടാത്തതുമായി ബന്ധപ്പെട്ട കമന്റിന് പ്രതികരണമായി അമിത് ചക്രവർത്തി എന്ന യുവാവ് സ്മൈലി ഇമോജി ഇട്ടിരുന്നു. ഇതിന് പിന്നാലെ വർനാലി പൊലീസിൽ പരാതി നൽകുകയായിരുന്നു.

വർനാലി ഫേസ്സ്ബുക്കിൽ പങ്കുവെച്ച പോസ്റ്റിന് താഴെ നരേഷ് ബരുവ എന്ന വ്യക്തി ‘ഇന്ന് മേക്കപ്പ് ഒന്നും ഇട്ടില്ലേ മാം’ എന്ന് കമൻറ് ചെയ്തു. ഈ കമന്റിന് പ്രതികരണമായാണ് അമിത് ചിരിക്കുന്ന ഇമോജി ഇട്ടത്. ബരുവയുടെ കമന്റിന് ‘നിങ്ങളുടെ പ്രശ്‌നം എന്താണ്?’ എന്ന് വർനാലി തിരിച്ച് ചോദിക്കുകയും ചെയ്തിരുന്നു. ഇതിന് പിന്നാലെയാണ് സ്മൈൽ ഇമോജി വന്നതും. തന്നെ പരിഹസിച്ച് കമൻറിട്ടതിനും അതിനെ പ്രോത്സാഹിപ്പിച്ചതിനും അമിതിനേയും ബരുവയേയും കൂടാതെ അബ്ദുൽ സുബൂർ ചൗധരി എന്നയാൾക്കെതിരേയും വർനാലി പൊലീസിൽ പരാതി നൽകിയിട്ടുണ്ട്.

സൈബർ സ്‌പെയ്‌സിൽ ശല്ല്യം ചെയ്‌തെന്നും അപകീർത്തികരമായ കമന്റുകൾ പങ്കുവെയ്ക്കുകയും ചെയ്തുവെന്ന് ആരോപിച്ചാണ് വർനാലി മൂന്ന് പേർക്കെതിരെ പരാതി നൽകിയത്. പരാതിയുടെ അടിസ്ഥാനത്തിൽ അമിതിനെതിരെ കേസെടുത്ത പൊലീസ് തന്റെ വീടിന് 273 കിലോമീറ്റർ അകലെയുള്ള കൊക്രാജർ കോടതിയിലേക്ക് വിളിച്ചുവരുത്തി. പോസ്റ്റിന്റേയും അതിന് താഴെ വന്ന കമന്റുകളുടേയും സ്‌ക്രീൻ ഷോട്ടുകൾ ഉൾപ്പടെ കോടതിയിൽ വർനാലി സമർപ്പിച്ചിട്ടുണ്ട്. എന്നാൽ വർനാലി ദേക ഐഎഎസ് ഓഫീസറാണെന്നോ ഡെപ്യൂട്ടി കമ്മീഷ്ണർ ആണെന്നോ തനിക്ക് അറിയില്ലായിരുന്നുവെന്നാണ് പൊലീസ് കസ്റ്റഡിയിലെടുത്ത അമിത് പറയുന്നത്.