പത്മജ വേണുഗോപാൽ ബിജെപി അംഗത്വം ഉപേക്ഷിച്ചു. നിലവിൽ വിദേശയാത്രയിലുള്ള സംസ്ഥാന അധ്യക്ഷൻ രാജീവ് ചന്ദ്രശേഖറിനെ ഫോണിൽ ബന്ധപ്പെട്ട് തീരുമാനത്തിന് പിന്നിലെ കാരണങ്ങൾ വിശദീകരിച്ച ശേഷമാണ് പത്മജ ഇമെയിൽ വഴി രാജിക്കത്ത് കൈമാറിയത്. കെ. കരുണാകരന്റെ മകൾ കോൺഗ്രസിനൊപ്പം തന്നെ നിൽക്കണമെന്ന കുടുംബത്തിന്റെയടക്കം ശക്തമായ സമ്മർദ്ദത്തെ തുടർന്നാണ് ഈ പിന്മാറ്റമെന്ന് അവർ പാർട്ടി നേതൃത്വത്തെ അറിയിച്ചു.
ബിജെപിയുടെ ആശയങ്ങളുമായി പൊരുത്തപ്പെട്ടു പോകാൻ സാധിക്കാത്തതിനാലാണ് രാജി വച്ചതെന്ന് പത്മജ മാധ്യമങ്ങളോട് വ്യക്തമാക്കി. പാർട്ടിയുടെ പ്രത്യയശാസ്ത്രങ്ങൾ കൃത്യമായി മനസ്സിലാക്കാതെ, തൃശൂരിലെ അവഗണനയിൽ മനംനൊന്ത് പെട്ടെന്നെടുത്ത ഒരു തെറ്റായ തീരുമാനമായിരുന്നു ബിജെപി പ്രവേശനമെന്നും അവർ തുറന്നുസമ്മതിച്ചു. കരയ്ക്കിട്ട മീനിനെപ്പോലെയായിരുന്നു തന്റെ അവസ്ഥയെന്നും, കെ. കരുണാകരന്റെ മകളെന്ന ഉത്തരവാദിത്തം അന്ന് ഓർക്കേണ്ടതായിരുന്നുവെന്നും പറഞ്ഞ പത്മജ, ആ തെറ്റ് തിരുത്തേണ്ട സമയമായതായും കൂട്ടിച്ചേർത്തു. സ്ഥാനമാനങ്ങൾ ലഭിക്കാത്തതല്ല രാജിക്ക് കാരണമെന്നും, താൻ ഒരു പദവിയും ആവശ്യപ്പെട്ടിരുന്നില്ലെന്നും അവർ വ്യക്തമാക്കി. ബിജെപി അധ്യക്ഷൻ രാജീവ് ചന്ദ്രശേഖർ വളരെ മാന്യനായ വ്യക്തിയാണെന്നും, അദ്ദേഹം പോലും ആ പാർട്ടിക്ക് അനുയോജ്യനാണോ എന്ന് തനിക്ക് സംശയം തോന്നിയിട്ടുണ്ടെന്നും പത്മജ അഭിപ്രായപ്പെട്ടു.
അതേസമയം, പത്മജ ഇതുവരെ തന്നോട് നേരിട്ട് സംസാരിച്ചിട്ടില്ലെന്നും, രാജിവച്ച ശേഷം കോൺഗ്രസിലേക്ക് മടങ്ങിവരാൻ താൽപ്പര്യം അറിയിച്ചാൽ അക്കാര്യം പരിഗണിക്കുമെന്നും കെപിസിസി പ്രസിഡന്റ് സണ്ണി ജോസഫ് പ്രതികരിച്ചു. എന്നാൽ, പത്മജയുടെ തിരിച്ചുവരവ് സംബന്ധിച്ച വാർത്തകൾ പുറത്തുവന്നതോടെ തൃശൂരിലെ ഒരു വിഭാഗം കോൺഗ്രസ് നേതാക്കൾ ഇതിനെതിരെ ശക്തമായ വിയോജിപ്പുമായി രംഗത്തെത്തിയിട്ടുണ്ട്. അവരെ പാർട്ടിയിലേക്ക് തിരികെ എടുക്കരുതെന്ന് ആവശ്യപ്പെട്ട് സംസ്ഥാന നേതൃത്വത്തെ സമീപിക്കാനാണ് ഇവരുടെ തീരുമാനം. ഇതിനിടെ, പത്മജയ്ക്കൊപ്പം ബിജെപിയിൽ ചേർന്ന് തൃശൂർ ജില്ലാ ഭാരവാഹികളായവരും പാർട്ടി വിട്ട് കോൺഗ്രസിലേക്ക് മടങ്ങാൻ ഒരുങ്ങുകയാണ്.








