കൊച്ചി കുണ്ടന്നൂർ ജംക്ഷന് സമീപം നിർമാണത്തിലിരിക്കുന്ന സ്വകാര്യ കെട്ടിടത്തിന്റെ ആൾനൂഴിയിൽ വീണ് പ്രവാസി യുവാവിന്റെ നട്ടെല്ലൊടിഞ്ഞ സംഭവത്തിൽ ബന്ധുക്കൾ മരട് പോലീസിൽ പരാതി നൽകി. മകളുടെ പിറന്നാൾ ആഘോഷത്തിൽ പങ്കെടുക്കാനായി നാട്ടിലെത്തിയ അരൂക്കുറ്റി പതിനൊന്നാം വാർഡിൽ കല്യാണപ്പറമ്പിൽ അലക്സ് ഡൊമിനിക്കിനാണ് (40) ഗുരുതരമായി പരിക്കേറ്റത്. കഴിഞ്ഞ ദിവസം വൈകിട്ട് അഞ്ചരയോടെ കുണ്ടന്നൂരിൽ വെച്ച് അരൂക്കുറ്റിയിലേക്കുള്ള ബസ് കാത്തുനിൽക്കുന്നതിനിടെയായിരുന്നു അപകടം.
റോഡിന്റെ വീതിക്കുറവും ടൈലുകൾ തകർന്ന അവസ്ഥയും വാഹനത്തിരക്കും കാരണം, അതിർത്തി മതിലില്ലാത്ത ഈ സ്വകാര്യ കെട്ടിടത്തിന്റെ മുറ്റത്തേക്ക് കയറിയാണ് യാത്രക്കാർ സാധാരണയായി ബസ് കാത്തുനിൽക്കാറുള്ളത്. ഇതിനിടെ അമിത വേഗതയിൽ വാഹനങ്ങൾ വരുന്നത് കണ്ട് പെട്ടെന്ന് പിന്നോട്ട് മാറിയപ്പോഴാണ് അലക്സ് ആൾനൂഴിയിലേക്ക് വീണത്.
ഒന്നരയാൾ താഴ്ചയുള്ള ടാങ്ക് കേവലം പ്ലാസ്റ്റിക് ഷീറ്റ് ഉപയോഗിച്ച് മാത്രം മൂടിയിരുന്നതിനാൽ അവിടെയൊരു കുഴിയുണ്ടെന്ന് തിരിച്ചറിയാൻ കഴിഞ്ഞിരുന്നില്ല. ഷീറ്റിൽ ചവിട്ടിയതും അലക്സ് ടാങ്കിനുള്ളിലേക്ക് പതിക്കുകയായിരുന്നു. ഒപ്പമുണ്ടായിരുന്ന യാത്രക്കാർ ബഹളം വെച്ചതിനെ തുടർന്ന് കെട്ടിടത്തിലെ തൊഴിലാളികൾ ഓടിയെത്തുകയും, ഏണി ഇറക്കി അലക്സിനെ പുറത്തെടുക്കുകയുമായിരുന്നു. ഉടൻതന്നെ ലേക്ഷോർ ആശുപത്രിയിൽ പ്രവേശിപ്പിച്ച ഇദ്ദേഹത്തിന് നട്ടെല്ലിന് പൊട്ടലുള്ളതായി കണ്ടെത്തുകയും തുടർന്ന് ശസ്ത്രക്രിയയ്ക്ക് വിധേയനാക്കുകയും ചെയ്തു.








