കാനഡയിലെ ഹാലിഫാക്സ് മേഖലയിലുള്ള പ്രധാന ആശുപത്രികളിൽ എലികളുടെയും പ്രാവുകളുടെയും ശല്യം രൂക്ഷമായതോടെ കീടനിയന്ത്രണത്തിനായി ചെലവഴിക്കുന്ന തുക കുത്തനെ ഉയർന്നു. ക്യുഇടു ഹെൽത്ത് സയൻസസ് സെന്ററിൽ (QEII Health Sciences Centre) കഴിഞ്ഞ അഞ്ച് വർഷത്തിനിടെ കീടനിയന്ത്രണ ബജറ്റിൽ 798 ശതമാനത്തിന്റെ വർദ്ധനവാണ് ഉണ്ടായിരിക്കുന്നത്.
ആശുപത്രിയിലെ അത്യാഹിത വിഭാഗത്തിലും രോഗികളുടെ കിടക്കകളിൽ പോലും എലികൾ ഓടിനടക്കുന്നതായുള്ള ഞെട്ടിക്കുന്ന വിവരങ്ങളാണ് പുറത്തുവരുന്നത്. കഴിഞ്ഞ ശനിയാഴ്ച കുടുംബാംഗത്തിനൊപ്പം ക്യുഇടു ആശുപത്രിയിലെത്തിയ ജോർദാൻ ബോണപാർട്ട് എന്ന വ്യക്തിയാണ് എലികളുടെ ശല്യം നേരിൽ കണ്ട് അനുഭവം പങ്കുവെച്ചത്. ഇടനാഴികളിൽ മണിക്കൂറുകളോളം എലികളെ കണ്ടതിന് പിന്നാലെ, മുറിയിലേക്ക് മാറ്റിയ രോഗിയുടെ കട്ടിലിലേക്ക് ഭക്ഷണം തേടി എലി കയറാൻ ശ്രമിച്ചതായും അദ്ദേഹം വെളിപ്പെടുത്തി.
സിബിസി ന്യൂസ് പുറത്തുവിട്ട രേഖകൾ പ്രകാരം, ക്യുഇടുവിന്റെ കീടനിയന്ത്രണ ബജറ്റ് 35,942 ഡോളറിൽ നിന്ന് 323,075 ഡോളറായാണ് ഉയർന്നത്. ഡാർട്ട്മൗത്ത് ജനറൽ ഹോസ്പിറ്റലിൽ ഇത് 1,157 ശതമാനം വർദ്ധിച്ച് 120,012 ഡോളറിലെത്തി. കഴിഞ്ഞ അഞ്ച് വർഷത്തിനിടെ ഈ രണ്ട് ആശുപത്രികളിൽ നിന്നുമായി ഏകദേശം 1,750-ലധികം എലികളെയാണ് പിടികൂടിയത്. അതേസമയം, തൊട്ടടുത്തുള്ള ഐഡബ്ല്യുകെ (IWK) ഹെൽത്ത് സെന്ററിൽ പ്രാവുകളുടെ ശല്യം നിയന്ത്രിക്കുന്നതിനായി കഴിഞ്ഞ വർഷം 180,000 ഡോളറാണ് ചെലവഴിച്ചത്.
ആശുപത്രി പരിസരങ്ങളിൽ നടക്കുന്ന വിപുലമായ നിർമ്മാണ പ്രവർത്തനങ്ങളും പഴക്കം ചെന്ന കെട്ടിടങ്ങളുമാണ് എലിശല്യം ഇത്രയധികം വർദ്ധിക്കാൻ കാരണമെന്ന് നോവ സ്കോഷ ഹെൽത്ത് അധികൃതർ വ്യക്തമാക്കുന്നു. പ്രശ്നം പരിഹരിക്കാനായി ദിവസേനയുള്ള കീടനിയന്ത്രണ പരിശോധനകളും കെട്ടിടങ്ങളിലെ വിള്ളലുകൾ അടയ്ക്കുന്ന ജോലികളും ഊർജ്ജിതമാക്കിയിട്ടുണ്ടെങ്കിലും, വർഷങ്ങളായി നിലനിൽക്കുന്ന ഈ പ്രതിസന്ധി പൂർണ്ണമായി പരിഹരിക്കാൻ ഇനിയും സമയമെടുക്കുമെന്നാണ് അധികൃതരുടെ വിലയിരുത്തൽ.
