കാനഡയുടെ ചരിത്രത്തിലെ ഏറ്റവും വലിയ സാംസ്കാരിക നിക്ഷേപമായ 4 ബില്യൺ ഡോളറിന്റെ പദ്ധതിക്ക് പ്രധാനമന്ത്രി മാർക്ക് കാർണി പ്രാധാന്യം നൽകി. രാജ്യത്തിന്റെ സാംസ്കാരിക സ്ഥാപനങ്ങളെ ശക്തിപ്പെടുത്തുക, കനേഡിയൻ സംസ്കാരത്തിന്റെ വ്യാപ്തി വർധിപ്പിക്കുക, വിവിധ സമൂഹങ്ങളെ ഒന്നിപ്പിക്കുക, കലാകാരന്മാർക്ക് കൂടുതൽ അവസരങ്ങൾ ഒരുക്കുക എന്നിവയാണ് നിക്ഷേപത്തിന്റെ പ്രധാന ലക്ഷ്യങ്ങൾ. കാനഡയുടെ പരമാധികാരം ശക്തിപ്പെടുത്തുന്നതിനും ജനങ്ങൾക്ക് സ്വന്തം ജീവിതം സ്വതന്ത്രമായി നയിക്കാനുള്ള സാഹചര്യം ഒരുക്കുന്നതിനുമുള്ള സർക്കാരിന്റെ പദ്ധതിയുടെ അടുത്ത ഘട്ടമാണ് 2026-ലെ ഫെഡറൽ ബജറ്റെന്ന് പ്രധാനമന്ത്രി വ്യക്തമാക്കി. സ്വന്തം ആശയങ്ങൾ പ്രകടിപ്പിക്കാനും കഥകൾ പങ്കുവെക്കാനും പരസ്പരം ബന്ധപ്പെടാനുമുള്ള കഴിവാണ് ഒരു രാജ്യത്തിന്റെ സർഗാത്മകതയുടെ അടിത്തറയെന്നും അദ്ദേഹം ചൂണ്ടിക്കാട്ടി. മോൺട്രിയലിൽ നടന്ന പരിപാടിയിലാണ് മാർക്ക് കാർണി ചരിത്രത്തിലെ ഏറ്റവും വലിയ സാംസ്കാരിക നിക്ഷേപത്തെക്കുറിച്ച് വിശദീകരിച്ചത്.

സാംസ്കാരിക സ്ഥാപനങ്ങളെ ശക്തിപ്പെടുത്തും

രാജ്യത്തിന്റെ ചരിത്രവും പൈതൃകവും സംരക്ഷിക്കുകയും വിവിധ പ്രദേശങ്ങളിലെയും ഭാഷകളിലെയും ജനങ്ങളെ ബന്ധിപ്പിക്കുകയും ചെയ്യുന്ന സാംസ്കാരിക സ്ഥാപനങ്ങളുടെ നവീകരണത്തിനും പ്രവർത്തനങ്ങൾ മെച്ചപ്പെടുത്തുന്നതിനും ബജറ്റിൽ പ്രത്യേക പരിഗണന നൽകിയിട്ടുണ്ട്. 2026-27 മുതൽ അഞ്ച് വർഷത്തേക്ക് ദേശീയ മ്യൂസിയങ്ങൾ, നാഷണൽ ബാറ്റിൽഫീൽഡ്സ് കമ്മീഷൻ, നാഷണൽ ആർട്സ് സെന്റർ, ലൈബ്രറി ആൻഡ് ആർക്കൈവ്സ് കാനഡ എന്നിവയുടെ അടിസ്ഥാന സൗകര്യങ്ങൾ നവീകരിക്കാനും ശേഖരങ്ങൾ സംരക്ഷിക്കാനും പ്രദർശനങ്ങളും കലാപരിപാടികളും നിലനിർത്താനും ഏകദേശം 800 മില്യൺ ഡോളർ അനുവദിക്കും. CBC/Radio-Canadaയുടെ പ്രവർത്തനശേഷി വർധിപ്പിക്കുന്നതിനായി 2026-27 മുതൽ രണ്ട് വർഷത്തേക്ക് അധികമായി 300 മില്യൺ ഡോളർ നൽകും. ഗ്രാമീണ, വിദൂര, വാർത്താസേവനങ്ങൾ കുറഞ്ഞ മേഖലകളിലുൾപ്പെടെ സ്വതന്ത്ര പ്രാദേശിക മാധ്യമപ്രവർത്തനത്തെ ശക്തിപ്പെടുത്താൻ Local Journalism Initiative-ന് 2027-28 മുതൽ നാല് വർഷത്തേക്ക് 130 മില്യൺ ഡോളറിലധികവും തുടർന്ന് തുടർച്ചയായി 40 മില്യൺ ഡോളറിലധികവും അനുവദിക്കും. യോഗ്യതയുള്ള സ്വകാര്യ ഓഡിയോ, ഓഡിയോവിഷ്വൽ വാർത്താ സ്ഥാപനങ്ങൾക്കും 35 ശതമാനം Canadian Journalism Labour Tax Credit ലഭ്യമാക്കാനുള്ള നിർദേശവും ബജറ്റിലുണ്ട്.

സാംസ്കാരിക പരിപാടികൾ കൂടുതൽ ജനകീയമാക്കും

കാനഡയുടെ ചരിത്രവും സാംസ്കാരിക പൈതൃകവും അടുത്തറിയാൻ കൂടുതൽ അവസരങ്ങൾ ഒരുക്കുന്നതിന്റെ ഭാഗമായി നിരവധി പദ്ധതികളാണ് ബജറ്റിൽ ഉൾപ്പെടുത്തിയിരിക്കുന്നത്. 2027-ലെ വേനൽക്കാലത്ത് Canada Strong Pass പുതുക്കുന്നതിനായി 75 മില്യൺ ഡോളറിലധികം അനുവദിക്കും. ഇതിലൂടെ ദേശീയ പാർക്കുകൾ, മ്യൂസിയങ്ങൾ, റെയിൽ യാത്രകൾ എന്നിവ സൗജന്യമായോ കുറഞ്ഞ നിരക്കിലോ ആസ്വദിക്കാം. തദ്ദേശീയ ജനവിഭാഗങ്ങൾ നടത്തുന്ന മ്യൂസിയങ്ങൾക്കും സാംസ്കാരിക കേന്ദ്രങ്ങൾക്കും കുറഞ്ഞ നിരക്കിലുള്ള പ്രവേശന സൗകര്യവും വ്യാപിപ്പിക്കും. 25 വയസ്സിൽ താഴെയുള്ളവർക്ക് ദേശീയ മ്യൂസിയങ്ങളിൽ വർഷം മുഴുവൻ സൗജന്യ പ്രവേശനം ഉറപ്പാക്കാൻ 2026-27 മുതൽ അഞ്ച് വർഷത്തേക്ക് 45 മില്യൺ ഡോളറിലധികവും തുടർന്ന് 10 മില്യൺ ഡോളറിലധികവും അനുവദിക്കും. കാനഡയുടെ കല, സംസ്കാരം, പൈതൃകം എന്നിവ നേരിട്ടും ഓൺലൈനായും ജനങ്ങളിലേക്ക് എത്തിക്കുന്നതിനായി National Gallery of Canadaയ്ക്ക് നാല് വർഷത്തേക്ക് 60 മില്യൺ ഡോളർ നൽകും. കനേഡിയൻ പുസ്തകങ്ങളുടെ സൗജന്യ ദേശീയ ഡിജിറ്റൽ ശേഖരം ഒരുക്കുന്നതിനായി നാല് വർഷത്തേക്ക് 30 മില്യൺ ഡോളറിലധികം അനുവദിക്കും. 2027-28ൽ കുറഞ്ഞത് 200 പുസ്തകങ്ങളുമായി ആരംഭിക്കുന്ന ശേഖരം 2031-32 ആകുമ്പോഴേക്കും 2,000-ത്തിലധികം പുസ്തകങ്ങളായി വികസിപ്പിക്കും. കാനഡയിലെ പുസ്തക പ്രസാധന മേഖലയെ പ്രോത്സാഹിപ്പിക്കുന്നതിനും പ്രസാധകർക്ക് ആഭ്യന്തര-വിദേശ വായനക്കാരിലേക്ക് എത്തിച്ചേരുന്നതിനും Canada Book Fund പുതുക്കുന്നതിനായി നാല് വർഷത്തേക്ക് 20 മില്യൺ ഡോളറും തുടർന്നുള്ള വർഷങ്ങളിൽ അഞ്ച് മില്യൺ ഡോളറും അനുവദിക്കും.

ജനങ്ങളെ ഒന്നിപ്പിക്കാനും അന്താരാഷ്ട്ര ബന്ധങ്ങൾ ശക്തിപ്പെടുത്താനും പദ്ധതികൾ

പ്രാദേശിക ഉത്സവങ്ങൾ, കാനഡയുടെ 160-ാം വാർഷികാഘോഷം, 2028-ലെ ഫ്രാങ്കോഫോണി ഉച്ചകോടി തുടങ്ങിയ പരിപാടികൾക്കായി പുതിയ നിക്ഷേപങ്ങൾ പ്രഖ്യാപിച്ചിട്ടുണ്ട്. കാനഡയുടെ 160-ാം വാർഷികാഘോഷത്തിന്റെ ഭാഗമായി പ്രത്യേക പരിപാടികൾ സംഘടിപ്പിക്കാനും പുതിയ Heritage Minutes വീഡിയോകൾ നിർമ്മിക്കാനും Trans Canada Trail വികസിപ്പിക്കാനും 2027-28ൽ 300 മില്യൺ ഡോളർ അനുവദിക്കും. കാനഡയുടെ ഫ്രഞ്ച് ഭാഷാ-സാംസ്കാരിക പൈതൃകത്തിന് അന്താരാഷ്ട്ര തലത്തിൽ കൂടുതൽ പ്രാധാന്യം നൽകുന്നതിനും 2028-ലെ Francophonie Summit സംഘടിപ്പിക്കുന്നതിനുമായി 2027-28 മുതൽ മൂന്ന് വർഷത്തേക്ക് ഏകദേശം 400 മില്യൺ ഡോളർ അനുവദിക്കും. ലോകമെമ്പാടുമുള്ള ഫ്രഞ്ച് ഭാഷ സംസാരിക്കുന്ന സമൂഹങ്ങളുമായി ബന്ധം ശക്തിപ്പെടുത്തുകയാണ് ലക്ഷ്യം. പ്രാദേശിക കലോത്സവങ്ങളും കലാപരിപാടികളും പ്രോത്സാഹിപ്പിക്കുന്നതിനായി Building Communities through Arts and Heritage പദ്ധതിക്ക് 2027-28ൽ 10 മില്യൺ ഡോളറും Canada Arts Presentation Fund-ന് 15 മില്യൺ ഡോളറും നൽകും.

കനേഡിയൻ കലാകാരന്മാർക്ക് കൂടുതൽ സാമ്പത്തിക പിന്തുണ

കലാകാരന്മാർക്ക് അവരുടെ സർഗാത്മക പ്രവർത്തനങ്ങളിലൂടെ ഉപജീവനം കണ്ടെത്താനും പുതിയ സൃഷ്ടികൾ അവതരിപ്പിക്കാനും സഹായിക്കുന്നതിനായി പ്രത്യേക പദ്ധതികളും ബജറ്റിൽ നിർദേശിച്ചിട്ടുണ്ട്.

Canada Creative Credit: സ്വന്തം സർഗാത്മക കലാസൃഷ്ടികളിൽ നിന്ന് ലഭിക്കുന്ന യോഗ്യതയുള്ള വാർഷിക അറ്റ ബിസിനസ് വരുമാനത്തിൽ 45,000 ഡോളർ വരെയുള്ള തുകയ്ക്ക് നികുതിയിളവ് നൽകാൻ കഴിയുന്ന പുതിയ വ്യക്തിഗത ആദായനികുതി ക്രെഡിറ്റ് അവതരിപ്പിക്കാൻ നിർദേശം.

Productivity Mega Deduction: സിനിമാ നിർമ്മാതാക്കൾക്കും കഥാകൃത്തുക്കൾക്കും ക്യാമറകൾ, ലൈറ്റിങ്, ശബ്ദ ഉപകരണങ്ങൾ, എഡിറ്റിങ് സംവിധാനങ്ങൾ, സ്റ്റേജ് അടിസ്ഥാന സൗകര്യങ്ങൾ എന്നിവയിൽ നിക്ഷേപിക്കുന്നതിന് സഹായകമായി യോഗ്യമായ ഉപകരണങ്ങളുടെയും സാങ്കേതികവിദ്യയുടെയും ചെലവ് ബിസിനസുകൾക്ക് ഉടൻ നികുതി കണക്കിൽ കുറയ്ക്കാൻ അനുവദിക്കും.

നാടകം, നൃത്തം, സംഗീതം തുടങ്ങിയ തത്സമയ കലാപരിപാടികളുടെ സൃഷ്ടി, നിർമ്മാണം, അവതരണം എന്നിവയ്ക്ക് സഹായം നൽകുന്നതിനായി Canada Council for the Arts-ന് 2027-28 മുതൽ മൂന്ന് വർഷത്തേക്ക് 20 മില്യൺ ഡോളർ അനുവദിക്കും.

കനേഡിയൻ സംസ്കാരത്തിന്റെ ഭാവി ശക്തിപ്പെടുത്തും

നിരവധി ജനവിഭാഗങ്ങളുടെയും ചരിത്രങ്ങളുടെയും സംസ്കാരങ്ങളുടെയും സംഭാവനകളിലൂടെയാണ് കാനഡയുടെ ദേശീയ സ്വത്വം രൂപപ്പെട്ടതെന്ന് പ്രധാനമന്ത്രി വ്യക്തമാക്കി. രാജ്യത്തിന്റെ കഥകൾ പറയുന്ന കലാകാരന്മാരെയും അവ സംരക്ഷിക്കുന്ന സ്ഥാപനങ്ങളെയും സജീവമാക്കുന്ന സമൂഹങ്ങളെയും പിന്തുണയ്ക്കുന്നതിലൂടെ കാനഡയുടെ പൊതുവായ ദേശീയ സ്വത്വം കൂടുതൽ ശക്തിപ്പെടുത്താനാണ് ബജറ്റ് ലക്ഷ്യമിടുന്നത്. സ്വന്തം ശബ്ദത്തിലും സ്വന്തം കാഴ്ചപ്പാടിലും കാനഡയുടെ കഥ ലോകത്തോട് പറയാൻ കഴിയുന്ന സാഹചര്യം സൃഷ്ടിക്കുകയാണ് ഈ ചരിത്രപരമായ സാംസ്കാരിക നിക്ഷേപത്തിന്റെ പ്രധാന ലക്ഷ്യം.