പത്തു വയസ്സുകാരി മലേഷ്യ ആൽഫോർഡിന്റെ വധവുമായി ബന്ധപ്പെട്ട് വളർത്തമ്മയായ കാർപ്രൈസ് വില്യംസിനെതിരെ (36) ഫിലാഡൽഫിയ പൊലീസ് കൊലപാതകക്കുറ്റം ചുമത്തി അറസ്റ്റ് ചെയ്തു. ഒക്‌ടോബർ 22-നാണ് കുട്ടിയെ അവസാനമായി ജീവനോടെ കാണുന്നത്. നാല് ദിവസങ്ങൾക്ക് ശേഷമാണ് കുട്ടി കാണാതായി എന്ന് പറഞ്ഞ് വളർത്തമ്മ പൊലീസിനെ സമീപിക്കുന്നത്. തുടർന്ന് പൊലീസും എഫ്.ബി.ഐയും നാട്ടുകാരും ചേർന്ന് തിരച്ചിൽ ശക്തമാക്കിയിരുന്നു.
കേസ് അന്വേഷണത്തിൽ നിർണായക വഴിത്തിരിവായത് ഒക്‌ടോബർ 26-ലെ സി.സി.ടി.വി ദൃശ്യങ്ങളാണ്. ഒരു വലിയ ബാഗിലാക്കി സംശയാസ്പദമായ വസ്തു വീട്ടിൽ നിന്ന് പുറത്തേക്ക് മാറ്റുന്നത് ഈ ദൃശ്യങ്ങളിൽ വ്യക്തമായിരുന്നു. ഇതേത്തുടർന്ന് നടത്തിയ തെരച്ചിലിൽ, വീട്ടിൽ നിന്ന് 20 മൈലോളം അകലെയുള്ള ന്യൂജേഴ്‌സിയിലെ ലിൻഡൻവോൾഡിൽ നിർത്തിയിട്ടിരുന്ന കാറിന്റെ ഡിക്കിയിൽ നിന്ന് കുട്ടിയുടെ മൃതദേഹം കണ്ടെത്തുകയായിരുന്നു.
തലയ്ക്കേറ്റ കഠിനമായ ആഘാതമാണ് മരണകാരണമെന്നാണ് പ്രാഥമിക നിഗമനം. മുൻപും കുട്ടി അതിക്രൂരമായ ശാരീരിക പീഡനങ്ങൾക്കിരയായിട്ടുണ്ടെന്ന് പ്രോസിക്യൂഷൻ സൂചിപ്പിച്ചു. കൊലപാതകം, തെളിവ് നശിപ്പിക്കൽ, കുട്ടിയുടെ സംരക്ഷണം ഉറപ്പാക്കുന്നതിൽ വീഴ്ച വരുത്തൽ, മൃതദേഹത്തോട് അനാദരം കാട്ടൽ എന്നീ കുറ്റങ്ങൾ ചുമത്തി ജാമ്യമില്ലാ വകുപ്പുകൾ പ്രകാരം തടവിലാക്കിയ വില്യംസിന്റെ വിചാരണ നവംബർ 23-ന് ആരംഭിക്കും.
റോബർട്ട് ഇ. ലാംബർട്ടൺ സ്കൂൾ വിദ്യാർഥിയായിരുന്ന മലേഷ്യ, ഫിലാഡൽഫിയ ഡിപ്പാർട്ട്മെന്റ് ഓഫ് ഹ്യൂമൻ സർവീസസിന്റെ സംരക്ഷണയിൽ ഫോസ്റ്റർ കെയർ വഴിയാണ് വളർന്നത്. നടുക്കുന്ന ഈ സംഭവത്തിൽ ഫിലാഡൽഫിയ മേയർ ചെറെൽ പാർക്കറും പൊലീസ് കമ്മീഷണറും അനുശോചനം രേഖപ്പെടുത്തുകയും കുറ്റക്കാർക്ക് അർഹമായ ശിക്ഷ ഉറപ്പാക്കുമെന്ന് വ്യക്തമാക്കുകയും ചെയ്തിട്ടുണ്ട്.
