കാനഡ-യുഎസ് വ്യാപാരയുദ്ധം അവസാനിക്കുന്നതായി സൂചന. യുഎസിൽ നടക്കാനിരിക്കുന്ന ഇടക്കാല തിരഞ്ഞെടുപ്പും രാജ്യത്തെ കടുത്ത വിലക്കയറ്റവും കണക്കിലെടുത്ത്, ട്രംപ് ഭരണകൂടം വ്യാപാര ചർച്ചകൾ വേഗത്തിലാക്കിയതായി പുതിയ റിപ്പോർട്ടുകൾ സൂചിപ്പിക്കുന്നു. മുൻ ആഴ്ചകളെ അപേക്ഷിച്ച് കഴിഞ്ഞ കുറച്ചു ദിവസങ്ങളായി വൈറ്റ് ഹൗസ് കാനഡയുമായുള്ള വ്യാപാര ചർച്ചകളിൽ വലിയ താത്പര്യം കാണിക്കുന്നുണ്ട്. ഇതോടെ, ഓഗസ്റ്റിൽ ചർച്ചകൾ തടസ്സപ്പെട്ട ഓട്ടോമൊബൈൽ താരിഫ് ഉൾപ്പെടെയുള്ള വിഷയങ്ങളിൽ പുരോഗതിക്ക് സാധ്യത തെളിഞ്ഞിട്ടുണ്ട്.
ഇറാൻ യുദ്ധവും ട്രംപിന്‍റെ നികുതി നയങ്ങളും അമേരിക്കയിൽ കനത്ത വിലക്കയറ്റത്തിന് കാരണമായത് ജനങ്ങളിൽ വൻ അമർഷമുണ്ടാക്കിയിട്ടുണ്ട്. കൂടാതെ യു.എസ് സെനറ്റിലും ജനപ്രതിനിധി സഭയിലും ഭൂരിപക്ഷം നഷ്ടപ്പെടുമെന്ന ഭയവും ട്രംപിനെ ബാധിച്ചതായി റിപ്പോർട്ടുകൾ സൂചിപ്പിക്കുന്നു. മിഷിഗൺ, മെയ്ൻ എന്നീ സംസ്ഥാനങ്ങളിൽ കാനഡയ്‌ക്കെതിരായ താരിഫുകളും പ്രതികാര താരിഫുകളും തിരഞ്ഞെടുപ്പ് വിഷയമായതാണ് ട്രംപിന്‍റെ പുതിയ നീക്കത്തിന് പിന്നിലെന്ന് കരുതുന്നു.
അതേസമയം, “അമേരിക്ക ആത്മാർത്ഥമായി സഹകരിക്കാൻ തയ്യാറാണെങ്കിൽ ചർച്ച പുനഃരാരംഭിക്കാൻ കാനഡ സന്നദ്ധമാണെന്ന്” കനേഡിയൻ പ്രധാനമന്ത്രി മാർക്ക് കാർണി പ്രതികരിച്ചു. കാനഡ-യു.എസ് വ്യാപാര മന്ത്രി ഡൊമിനിക് ലെബ്ലാ ഔദ്യോഗിക പരിപാടികൾ റദ്ദാക്കി രാജ്യതലസ്ഥാനമായ ഓട്ടവയിൽ തുടരുന്നതും വ്യാപാര ചർച്ചകൾ പുരോഗമിക്കുന്നതിന്‍റെ സൂചനയായി വിലയിരുത്തപ്പെടുന്നു.
