പരീക്ഷണ ഘട്ടത്തിലുള്ള മരുന്നുകൾ വലിയ തോതിൽ ശരീരഭാരം കുറയ്ക്കുമെന്ന പ്രതീക്ഷ നൽകുന്നുണ്ടെങ്കിലും, ഓൺലൈൻ വിൽപ്പനക്കാർ ഗുണനിലവാരം ഉറപ്പില്ലാത്ത അംഗീകൃതമല്ലാത്ത ഉൽപ്പന്നങ്ങളാണ് നൽകുന്നത്. ഇത് അളവിലുള്ള പിഴവുകൾ, മായം കലരൽ, ഗുരുതരമായ ആരോഗ്യപ്രശ്നങ്ങൾ എന്നിവയെക്കുറിച്ചുള്ള ആശങ്കകൾ വർദ്ധിപ്പിക്കുന്നു.
വർഷങ്ങളായി അമിതവണ്ണത്തോട് പൊരുതുന്ന ആളുകളെ സംബന്ധിച്ചിടത്തോളം, ശരീരഭാരത്തിന്റെ നാലിലൊന്ന് കുറയ്ക്കാം എന്ന വാഗ്ദാനം അവഗണിക്കാന്‍ പ്രയാസമാണ്.
സെമാഗ്ലുടൈഡ് (semaglutide), ടിർസെപറ്റൈഡ് (tirzepatide) തുടങ്ങിയ ഭാരം കുറയ്ക്കുന്ന മരുന്നുകളുടെ വിജയം കൂടുതൽ ശക്തമായ ചികിത്സകൾക്കായുള്ള ആഗോള താല്പര്യം വർദ്ധിപ്പിച്ചു. നിലവിൽ, റെറ്റാട്രുട്ടൈഡ് (retatrutide), സെനഗാംടൈഡ് (zenagamtide) എന്നീ പരീക്ഷണാത്മക മരുന്നുകൾ ക്ലിനിക്കൽ പരീക്ഷണങ്ങളിൽ ശ്രദ്ധേയമായ ഫലങ്ങൾ നൽകിക്കൊണ്ട് പുതിയ തരംഗങ്ങൾ സൃഷ്ടിക്കുന്നുണ്ട്. എന്നാൽ ഇതിന്റെ മറുവശം എന്തെന്നാൽ – പതിവ് ഉപയോഗത്തിന് അനുമതി ലഭിക്കുന്നതിന് മുൻപ് തന്നെ അവ ഓൺലൈൻ വിപണിയിൽ ഇടംപിടിക്കുകയാണ്.
അമിതവണ്ണത്തിനുള്ള ചികിത്സാരീതിയെ മാറ്റിമറിക്കാനുള്ള സാധ്യതകളിലൂടെ റെറ്റാട്രുട്ടൈഡും സെനഗാംടൈഡും വലിയ ശ്രദ്ധ ആകർഷിക്കുന്നുണ്ട്. ഇവയ്ക്ക് ഇതുവരെ സാധാരണ ഭാരം കുറയ്ക്കുന്നതിനുള്ള ചികിത്സയ്ക്കായി അംഗീകാരം ലഭിച്ചിട്ടില്ല. എങ്കിലും ഓൺലൈൻ വിൽപ്പനക്കാർ ഇവയുടെ പേരിൽ ഉൽപ്പന്നങ്ങൾ വാഗ്ദാനം ചെയ്യുന്നു, അതേസമയം സോഷ്യൽ മീഡിയ ഇൻഫ്ലുവൻസർമാർ ഇവയുടെ ഫലങ്ങളെക്കുറിച്ച് ചർച്ച ചെയ്യുകയും വിതരണക്കാരുടെ ലിങ്കുകൾ പങ്കിടുകയും ചെയ്യുന്നു. പൊടി രൂപത്തിലുള്ള ഘടകങ്ങൾ എങ്ങനെ വെള്ളത്തിൽ ചേർത്ത് (reconstitute) സ്വയം കുത്തിവയ്ക്കാം എന്ന് ചില വീഡിയോകൾ കാണിച്ചുതരികയും ചെയ്യുന്നുണ്ട്. ഈ പരീക്ഷണാത്മക ഘടകങ്ങൾ ഓൺലൈനിൽ എത്ര എളുപ്പത്തിൽ കണ്ടെത്താനാകുമെന്ന് ജാമാ (JAMA) പ്രസിദ്ധീകരിച്ച ഒരു റിപ്പോർട്ട് വ്യക്തമാക്കുന്നു. ക്ലിനിക്കൽ പരീക്ഷണങ്ങൾക്ക് പുറത്തും വൈദ്യസഹായമില്ലാതെയും ആളുകൾ ഇവ ഉപയോഗിക്കുന്നുണ്ടാകാം എന്ന ആശങ്കയാണ് ഇത് ഉയർത്തുന്നത്.
