എച്ച്-1ബി വിസയിലൂടെയെത്തുന്ന വിദേശ തൊഴിലാളികളെ വിമർശിച്ചുകൊണ്ട് യുഎസ് വൈസ് പ്രസിഡന്റ് ജെ.ഡി വാൻസ് നടത്തിയ പരാമർശങ്ങൾ വലിയ വിവാദങ്ങൾക്ക് വഴിവെച്ചിരുന്നു. ഈ പശ്ചാത്തലത്തിൽ, ദക്ഷിണേന്ത്യയിൽ നിന്നും അമേരിക്കയിലേക്ക് കുടിയേറിയ തന്റെ ഭാര്യാമാതാപിതാക്കളെയും, അമേരിക്കയിൽ ജനിച്ച് നിലവിൽ രാജ്യത്തിന്റെ സെക്കൻഡ് ലേഡിയുമായ ഭാര്യ ഉഷ വാൻസിനെയും താൻ അതിയായി സ്നേഹിക്കുന്നുണ്ടെന്നും അവരിൽ അഭിമാനിക്കുന്നുണ്ടെന്നും അദ്ദേഹം വ്യക്തമാക്കി.
തന്റെ പ്രസ്താവന അപൂർണ്ണമായിരുന്നുവെന്നും അതിന്റെ ഉത്തരവാദിത്വം താൻ ഏറ്റെടുക്കുന്നുവെന്നും വാൻസ് പറഞ്ഞു. യുഎസിലെ തൊഴിലാളികളുടെ താൽപ്പര്യങ്ങൾ സംരക്ഷിക്കുകയാണ് തന്റെ ലക്ഷ്യമെന്നും, വിദേശ തൊഴിലാളികളെ ഉപയോഗിച്ച് തൊഴിൽ മേഖല ചൂഷണം ചെയ്യപ്പെടുന്ന പ്രവണതയാണ് ഇതിലൂടെ താൻ എതിർത്തതെന്നും അദ്ദേഹം ന്യായീകരിച്ചു. അമേരിക്കൻ പൗരന്മാർ സന്തോഷത്തോടെ ചെയ്യാൻ തയ്യാറുള്ള ജോലികൾക്കായി വിദേശത്തുനിന്ന് കരാർ തൊഴിലാളികളെ ഇറക്കുമതി ചെയ്യുന്ന രീതി യുഎസ് കമ്പനികൾ അവസാനിപ്പിക്കണമെന്നും വാൻസ് ആവശ്യപ്പെടുകയുണ്ടായി.
