2025 ഒക്ടോബർ 30-നോ അതിനു ശേഷമോ സമർപ്പിക്കുന്ന പുതുക്കൽ അപേക്ഷകൾക്ക് തൊഴിൽ അനുമതിയുടെ (Employment Authorization) ഓട്ടോമാറ്റിക് കാലാവധി നീട്ടൽ അവസാനിപ്പിച്ചുകൊണ്ട് ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS) പുതിയ നിയമം കൊണ്ടുവന്നു.
യുഎസ് പ്രസിഡന്റ് ഡൊണാൾഡ് ട്രംപിന്റെ വിപുലമായ ഇമിഗ്രേഷൻ നയങ്ങളുടെ ഭാഗമായി കുടിയേറ്റക്കാരെ ബാധിക്കുന്ന മറ്റൊരു നിർണ്ണായക തീരുമാനം യുഎസ് ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS) ചൊവ്വാഴ്ച (പ്രാദേശിക സമയം) പ്രഖ്യാപിച്ചു. തൊഴിൽ അനുമതി പത്രത്തിന്റെ (work authorization) കാലാവധി അവസാനിച്ചതിന് ശേഷവും, പുതുക്കൽ അപേക്ഷകൾ പരിശോധനയിലിരിക്കെ ജോലിയിൽ തുടരാൻ കുടിയേറ്റക്കാർക്ക് അനുവാദം നൽകിയിരുന്ന സാവകാശമാണ് പുതിയ നിബന്ധനയിലൂടെ റദ്ദാക്കിയത്.
പുതിയ DHS നിയമം വർക്ക് പെർമിറ്റ് ഓട്ടോമാറ്റിക് എക്സ്റ്റൻഷൻ അവസാനിപ്പിക്കുന്നു
ബ്ലൂംബെർഗ് ലോ (Bloomberg Law) റിപ്പോർട്ട് അനുസരിച്ച്, യോഗ്യരായ കുടിയേറ്റക്കാർക്ക് പെർമിറ്റ് പുതുക്കൽ അപേക്ഷകൾ പരിശോധനയിലായിരിക്കുമ്പോൾ രാജ്യത്ത് ജോലിയിൽ തുടരാൻ അനുവാദം നൽകിയിരുന്ന 540 ദിവസത്തെ ഓട്ടോമാറ്റിക് എക്സ്റ്റൻഷൻ കാലാവധി ഈ നിയമം സ്ഥിരമായി അവസാനിപ്പിക്കുന്നു. മുൻ പ്രസിഡന്റ് ജോ ബൈഡന്റെ ഭരണകാലത്ത് നടപ്പിലാക്കിയ ഈ കാലാവധി നീട്ടൽ ആനുകൂല്യം കഴിഞ്ഞ വർഷം DHS താത്കാലികമായി റദ്ദാക്കിയിരുന്നു.
ഇത് ആരെയാണ് ബാധിക്കുക?
യുഎസിൽ ജോലി ചെയ്യുന്ന വിദേശ തൊഴിലാളികൾക്കും, ജോലിയിൽ തുടരാൻ വർക്ക് പെർമിറ്റ് രേഖകളെ (EAD) ആശ്രയിക്കുന്ന H-1B വിസ ഉടമകളുടെ പങ്കാളികൾ ഉൾപ്പെടെയുള്ള ഇന്ത്യൻ പ്രൊഫഷണലുകൾക്കും ഈ പുതിയ നീക്കം വലിയ പ്രത്യാഘാതം ഉണ്ടാക്കും.
യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിലെ (USCIS) പ്രൊസസിംഗ് വൈകുന്നതുമൂലം ജോലി നഷ്ടപ്പെടാൻ സാധ്യതയുള്ള കുടിയേറ്റ തൊഴിലാളികൾക്ക് ആശ്വാസമേകാനാണ് ഈ ഗ്രേസ് പീരിയഡ് ഏർപ്പെടുത്തിയിരുന്നത്. എന്നാൽ ട്രംപ് ഭരണകൂടത്തിന് കീഴിൽ, കുടിയേറ്റക്കാർക്ക് വർക്ക് പെർമിറ്റുകൾ നിലനിർത്തുന്നതും പുതുക്കുന്നതും കൂടുതൽ പ്രയാസകരമാക്കുന്ന നടപടികളാണ് ഏജൻസി നടപ്പിലാക്കിയത്.
അപേക്ഷകർ അറിഞ്ഞിരിക്കേണ്ട കാര്യങ്ങൾ
2025 ഒക്ടോബർ 30 മുതൽ പ്രാബല്യത്തിൽ വന്ന പുതുക്കിയ നയം അനുസരിച്ച്, ആ തീയതിയിലോ അതിനുശേഷമോ സമർപ്പിക്കുന്ന പുതുക്കൽ അപേക്ഷകൾക്ക് ഇനി ഓട്ടോമാറ്റിക് കാലാവധി നീട്ടൽ ലഭിക്കില്ല. നിലവിലെ രേഖകളുടെ കാലാവധി കഴിഞ്ഞാൽ, പുതുക്കിയ തൊഴിൽ അനുമതിക്ക് (EAD) അംഗീകാരം ലഭിക്കുന്നത് വരെ അപേക്ഷകർക്ക് ജോലി തുടരാൻ സാധിക്കില്ല.
തൊഴിൽ അനുമതി നീട്ടി നൽകുന്നതിന് മുമ്പ് പശ്ചാത്തല പരിശോധന, സുരക്ഷാ വിലയിരുത്തലുകൾ, യോഗ്യതാ നിർണ്ണയം എന്നിവ കൂടുതൽ കാര്യക്ഷമമാക്കുകയാണ് ഈ നയമാറ്റത്തിലൂടെ ലക്ഷ്യമിടുന്നതെന്ന് DHS വ്യക്തമാക്കുന്നു.
ഇന്ത്യക്കാരെയും H-4, H-1B വിസ ഉടമകളെയും ഇത് എങ്ങനെ ബാധിക്കും?
യുണൈറ്റഡ് സ്റ്റേറ്റ്സിൽ നിയമപരമായി ജോലി ചെയ്യുന്നതിന് എംപ്ലോയ്മെന്റ് ഓതറൈസേഷൻ ഡോക്യുമെന്റുകളെ (EAD) ആശ്രയിക്കുന്ന വിവിധ വിഭാഗങ്ങളിലുള്ള വിദേശ പൗരന്മാരെ ഈ നിയമം ബാധിച്ചേക്കാം. ഇമിഗ്രേഷൻ സ്റ്റാറ്റസ് മാറ്റത്തിന് (Adjustment of Status) അപേക്ഷിക്കുന്നവർ, യോഗ്യരായ അഭയാർത്ഥികൾ, വർക്ക് പെർമിറ്റിന് യോഗ്യതയുള്ള H-1B വിസ ഉടമകളുടെ പങ്കാളികളായ H-4 വിസ ഉടമകൾ എന്നിവർ ഇതിൽ ഉൾപ്പെടുന്നു.
USCIS പുതുക്കൽ അപേക്ഷകൾ പൂർത്തിയാക്കുന്നതിന് മുമ്പ് നിലവിലെ വർക്ക് പെർമിറ്റുകളുടെ കാലാവധി അവസാനിച്ചാൽ ഇന്ത്യൻ പ്രൊഫഷണലുകളും അവരുടെ ആശ്രിതരും വലിയ പ്രതിസന്ധി നേരിടേണ്ടി വരും. പ്രത്യേകിച്ച് H-4 EAD ഉടമകളുടെ പുതുക്കൽ അപേക്ഷ പരിശോധനയിലിരിക്കെ കാലാവധി കഴിഞ്ഞാൽ, അവർക്ക് താത്കാലികമായി ജോലി നിർത്തിവെക്കേണ്ടി വന്നേക്കാം.
EAD renewal അപേക്ഷകൾ ഉടൻ സമർപ്പിക്കാൻ USCIS നിർദ്ദേശം
കൃത്യസമയത്ത് പുതുക്കൽ അപേക്ഷകൾ സമർപ്പിക്കുന്നതിന്റെയും അപേക്ഷകളുടെ പ്രൊസസിംഗ് സമയക്രമം കൃത്യമായി നിരീക്ഷിക്കുന്നതിന്റെയും പ്രാധാന്യമാണ് ഈ മാറ്റം വ്യക്തമാക്കുന്നത്. നിലവിലെ രേഖകളുടെ കാലാവധി തീരുന്നതിന് 180 ദിവസം മുമ്പ് തന്നെ അപേക്ഷകർ അവരുടെ EAD പുതുക്കൽ അപേക്ഷകൾ സമർപ്പിക്കണമെന്ന് USCIS നിർദ്ദേശിച്ചിട്ടുണ്ട്.
തൊഴിൽ അനുമതിയിൽ തടസ്സങ്ങൾ ഉണ്ടാകാനുള്ള സാധ്യത കുറയ്ക്കുന്നതിന് ജീവനക്കാർ തങ്ങളുടെ തൊഴിൽ ദാതാക്കളുമായി നിരന്തരം ബന്ധപ്പെടുകയും അപേക്ഷയുടെ സ്റ്റാറ്റസ് പരിശോധിക്കുകയും വേണം.
എന്നാൽ, 2025 ഒക്ടോബർ 30-ന് മുമ്പ് സമർപ്പിച്ച യോഗ്യമായ അപേക്ഷകൾക്ക് മുൻ മാർഗ്ഗനിർദ്ദേശങ്ങൾ പ്രകാരം നൽകിയിട്ടുള്ള ഓട്ടോമാറ്റിക് എക്സ്റ്റൻഷനുകളെ ഈ നിയമം ബാധിക്കില്ല. കൂടാതെ statutory provisions അല്ലെങ്കിൽ Temporary Protected Status (TPS) ബന്ധപ്പെട്ട പ്രത്യേക അറിയിപ്പുകൾ വഴി അനുവദിച്ചിട്ടുള്ള അധിക എക്സ്റ്റൻഷനുകൾ തുടരുമെന്നും വ്യക്തമാക്കിയിട്ടുണ്ട്.
