ക്യുബെക്കിലുടനീളം വിറ്റഴിച്ച സ്മോക്ക്ഡ് കുക്ക്ഡ് ഹാം ലിസ്റ്റീരിയ അണുബാധ സാധ്യതയെ തുടർന്ന് തിരിച്ചുവിളിച്ചു. ‘ബൗച്ചറി വിയാവു ഇൻക്.’ (Boucherie Viau inc.) വിൽക്കുന്ന സ്മോക്ക്ഡ് കുക്ക്ഡ് ഹാം ആണ് ബാധിത ഉൽപ്പന്നമെന്ന് ക്യുബെക്ക് ഭക്ഷ്യ മന്ത്രാലയം അറിയിച്ചു. 2020 ഒക്ടോബർ 26 വരെ ഉപയോഗയോഗ്യമായ 6 46437 75444 6 എന്ന CUP നമ്പറും 100926JCFR Lot നമ്പറുമുള്ള വിവിധ രൂപങ്ങളിൽ വിൽക്കുന്ന സ്മോക്ക്ഡ് കുക്ക്ഡ് ഹാമാണ് ലിസ്റ്റീരിയ മോണോസൈറ്റോജീൻസ് ബാധിച്ചതായി കണ്ടെത്തിയത്.
സുതാര്യമായ പ്ലാസ്റ്റിക് ബാഗിൽ വാക്വം പാക്ക് ചെയ്ത ഈ ഉൽപ്പന്നം, മോൺട്രിയൽ, മോണ്ടെറെജി (Montérégie) മേഖലകളിലെ കടകളിൽ ശീതീകരിച്ച നിലയിലാണ് വിൽപനയ്ക്ക് വെച്ചിരുന്നത്. ഈ ഉൽപ്പന്നം കൈവശമുള്ളവർ അത് കഴിക്കരുതെന്ന് അധികൃതർ നിർദ്ദേശിച്ചു. ഈ ഉൽപ്പന്നവുമായ ബന്ധപ്പെട്ട് എന്തെങ്കിലും രോഗലക്ഷണങ്ങൾ കണ്ടാൽ ആരോഗ്യവിദഗ്ദ്ധനെ സമീപിക്കണമെന്നും പ്രവിശ്യാ ഭക്ഷ്യമന്ത്രാലയം അറിയിച്ചു.
