വീടുകളുടെ നിർമ്മാണം വേഗത്തിലാക്കാനും ലളിതമാക്കാനും ലക്ഷ്യമിട്ട് ടൊറന്റോ നഗരസഭ തങ്ങളുടെ പ്രീ-അപ്രൂവ്ഡ് ബിൽഡിംഗ് പ്ലാൻസ് പ്രോഗ്രാം വിപുലീകരിച്ചു. ഇതിന്റെ ഭാഗമായി ആധുനിക ഫോർപ്ലക്സ് (fourplex), സിക്സ്പ്ലക്സ് (sixplex) കെട്ടിടങ്ങൾക്കായുള്ള പുതിയ ഡിസൈനുകൾ പുറത്തിറക്കി. നഗരത്തിലെ വിവിധ തരം പ്രദേശങ്ങൾക്ക് അനുയോജ്യമായ രീതിയിലാണ് ഇവ തയ്യാറാക്കിയിരിക്കുന്നത്.
വീതികൂടിയതും കുറഞ്ഞതുമായ പ്ലോട്ടുകളിൽ നിർമ്മിക്കാൻ കഴിയുന്ന ഈ ഡിസൈനുകൾ, നഗരത്തിലെ ഗാർഡൻ, ലേൻവേ സ്യൂട്ടുകൾക്കായുള്ള നിലവിലെ പദ്ധതികളുടെ തുടർച്ചയായാണ് വരുന്നത്. ഈ സൗജന്യ ഡിസൈനുകൾ ലഭ്യമാക്കുന്നതിലൂടെ വീട്ടുഉടമകൾക്ക് രൂപകൽപ്പനയുമായി ബന്ധപ്പെട്ട പ്രാരംഭ നടപടികൾ വേഗത്തിൽ പൂർത്തിയാക്കാൻ സാധിക്കും. ടൊറന്റോയുടെ പ്രത്യേകതകൾക്കനുസരിച്ച് ഒന്റാറിയോ ബിൽഡിംഗ് കോഡ് പാലിച്ചാണ് ഈ പ്ലാനുകൾ തയ്യാറാക്കിയിരിക്കുന്നത്. സുസ്ഥിരമായ സൗകര്യങ്ങൾ, സൈക്കിൾ പാർക്കിംഗ്, മാലിന്യ സംഭരണം തുടങ്ങിയവയെല്ലാം ഇതിൽ ഉൾപ്പെടുത്തിയിട്ടുണ്ട്. പ്രവേശനക്ഷമത, കാലാവസ്ഥയെ പ്രതിരോധിക്കാനുള്ള ശേഷി, നിർമ്മാണച്ചെലവ്, എളുപ്പം എന്നിവ മുൻനിർത്തിയാണ് പ്രമുഖ ആർക്കിടെക്ചറൽ സ്ഥാപനം ഈ ഡിസൈനുകൾ തയ്യാറാക്കിയത്.
കനേഡിയൻ ഹൗസിംഗ് ആൻഡ് മോർട്ട്ഗേജ് കോർപ്പറേഷന്റെ (CMHC) ഹൗസിംഗ് ഡിസൈൻ കാറ്റലലോഗിന് കരുത്ത് പകരുന്നതാണ് ഈ പദ്ധതി. നിലവിൽ ടൊറന്റോയിൽ എല്ലായിടത്തും ഫോർപ്ലക്സുകൾ നിർമ്മിക്കാൻ അനുവാദമുണ്ട്. അതേസമയം സിക്സ്പ്ലക്സുകളുടെ അനുമതി സ്ഥലത്തിന് അനുസരിച്ച് വ്യത്യാസപ്പെടാം. സോണിംഗ് വ്യവസ്ഥകൾ പാലിക്കുന്ന പക്ഷം, ഉടമകൾക്ക് കമ്മിറ്റി ഓഫ് അഡ്ജസ്റ്റ്മെന്റിനെ സമീപിക്കാതെ നേരിട്ട് ബിൽഡിംഗ് പെർമിറ്റിനായി അപേക്ഷിക്കാം.
കെട്ടിട നിർമ്മാണ അനുമതിക്കായി പുതിയ മൾട്ടിപ്ലക്സ് പ്ലാനുകൾ ഉപയോഗിക്കാമെങ്കിലും, സൈറ്റിന്റെ പ്രത്യേകതകൾക്കനുസരിച്ചുള്ള ഡ്രോയിംഗുകൾ തയ്യാറാക്കാൻ യോഗ്യനായ ഒരു ഡിസൈൻ പ്രൊഫഷണലിന്റെ സേവനം അപേക്ഷകർ തേടേണ്ടതുണ്ട്. കൂടുതൽ വിവരങ്ങൾക്കും പ്ലാനുകൾ ഡൗൺലോഡ് ചെയ്യാനും www.toronto.ca/PreApprovedPlans സന്ദർശിക്കുക.
മൂന്ന് ദശലക്ഷത്തിലധികം ജനങ്ങൾ വസിക്കുന്ന ടൊറന്റോ കാനഡയുടെ പ്രധാന സാമ്പത്തിക കേന്ദ്രവും ലോകത്തിലെ ഏറ്റവും വൈവിധ്യമാർന്ന നഗരങ്ങളിലൊന്നുമാണ്. ഫിഫ ലോകകപ്പ് 2026-ന്റെ ഔദ്യോഗിക ആതിഥേയ നഗരമെന്ന നിലയിലും, സാങ്കേതികവിദ്യ, സംസ്കാരം, നവീകരണം എന്നിവയിൽ ആഗോള തലത്തിലും ടൊറന്റോ ഏറെ മുന്നിലാണ്. കൂടുതൽ വിവരങ്ങൾക്ക് നഗരസഭയുടെ ഔദ്യോഗിക വെബ്‌സൈറ്റ് സന്ദർശിക്കുകയോ സമൂഹമാധ്യമങ്ങൾ വഴിയോ ബന്ധപ്പെടാവുന്നതാണ്.
