യുഎസ്-മെക്സിക്കോ അതിർത്തിയിൽ പടിഞ്ഞാറൻ ടെക്സസ് ഭാഗത്ത്, ബിഗ് ബെൻഡ്’ മേഖലയിൽ ട്രംപ് ഭരണകൂടം അതിർത്തി മതിൽ നിർമ്മാണം ആരംഭിച്ചു. മതിൽ പൂർത്തിയാക്കുമെന്ന പ്രസിഡൻ്റ് ഡോണൾഡ് ട്രംപിന്റെ പ്രധാന തിരഞ്ഞെടുപ്പ് വാഗ്ദാനം നിറവേറ്റുന്നതിനായി, മതിലുകൾ, റോഡുകൾ, സാങ്കേതികവിദ്യ എന്നിവ ഉപയോഗിച്ച് അതിർത്തി സുരക്ഷിതമാക്കാനുള്ള 46 ബില്യൺ ഡോളറിന്റെ പദ്ധതിയിലെ സുപ്രധാന നാഴികക്കല്ലാണ് ഈ മതിൽ. യുഎസ്-മെക്സിക്കോ അതിർത്തിയിലുടനീളമുള്ള മതിൽ നിർമ്മാണത്തിന്റെ വേഗം ഇരട്ടിയാക്കിയതായി ‘കസ്റ്റംസ് ആൻഡ് ബോർഡർ പ്രൊട്ടക്ഷൻ’ (CBP) അറിയിച്ചതിന് പിന്നാലെയാണ് ഈ നടപടി.
പടിഞ്ഞാറൻ ടെക്സസിലെ ഹഡ്സ്പെത്ത് കൗണ്ടിയിൽ ‘ബിഗ് ബെൻഡ് 1’ എന്നറിയപ്പെടുന്ന 47 മൈൽ നീളമുള്ള ഭാഗത്ത് “അതിർത്തി മതിൽ പാനലുകൾ സ്ഥാപിക്കുന്ന ജോലി നടന്നുകൊണ്ടിരിക്കുകയാണെന്ന്” കസ്റ്റംസ് ആൻഡ് ബോർഡർ പ്രൊട്ടക്ഷൻ വ്യക്തമാക്കി. എൽ പാസോയ്ക്ക് തെക്ക് ഹഡ്സ്പെത്ത് കൗണ്ടിയിലെ ഒരു പ്രദേശം മുതൽ അമിസ്റ്റാഡ് തടാകം വരെ വ്യാപിച്ചുകിടക്കുന്ന ഏകദേശം 500 മൈൽ ദൈർഘ്യമുള്ള ബിഗ് ബെൻഡ് മേഖലയിൽ ആകെ അഞ്ച് പദ്ധതി പ്രദേശങ്ങളാണുള്ളത്.
സെപ്റ്റംബർ 15-നാണ് ആദ്യത്തെ പാനലുകൾ സ്ഥാപിച്ചതെന്ന് CBP അറിയിച്ചു. തെക്കൻ അതിർത്തിയിലുടനീളമുള്ള മതിൽ നിർമ്മാണത്തിന്റെ വിവരങ്ങൾ പങ്കുവെക്കുന്ന ഏജൻസിയുടെ വെബ്സൈറ്റിലെ ഭൂപടത്തിൽ, 30 അടി ഉയരമുള്ള സ്റ്റീൽ മതിൽ പാനലുകളിലൊന്ന് നിർമ്മാണ തൊഴിലാളികളുടെ സാന്നിധ്യത്തിൽ ഒരു ക്രെയിൻ ഉപയോഗിച്ച് ഉയർത്തി സ്ഥാപിക്കുന്ന ചിത്രം കാണാം.
