കൊല്ലം കുണ്ടറ പോലീസ് സ്റ്റേഷനിൽ പോലീസുകാരുടെ ഗുരുതരമായ വീഴ്ചയെ തുടർന്ന് കസ്റ്റഡിയിലെടുത്ത മോഷണക്കേസ് പ്രതി സ്റ്റേഷനിൽ നിന്ന് കടന്നുകളഞ്ഞു. എഴുകോൺ പുത്തൻനട സ്വദേശിയായ വൈജേഷ് (23) ആണ് ലോക്കപ്പ് തുറന്ന് പുറത്തിറങ്ങി രക്ഷപ്പെട്ടത്. ചൊവ്വാഴ്ച പുലർച്ചെ 1.30-ഓടെയാണ് സംഭവം നടന്നത്. രണ്ട് ദിവസം മുൻപ് നാന്തിരിക്കലിലെ ഒരു വീടിന് നേരെ നടന്ന വയറിങ് സാമഗ്രികളുടെ മോഷണവുമായി ബന്ധപ്പെട്ടാണ് പോലീസ് ഇയാളെ കസ്റ്റഡിയിലെടുത്തത്.
കേസിൽ ഇരയായ വീട്ടുകാർ സ്വന്തം നിലയിൽ അന്വേഷണം നടത്തുകയും, നാന്തിരിക്കലിലെ ഒരു കടയിൽ നിന്ന് വയറിങ്, പ്ലമിങ് ഉപകരണങ്ങൾ മുറിക്കുന്നതിനുള്ള സാധനങ്ങൾ വൈജേഷ് വാടകയ്‌ക്കെടുത്തിട്ടുണ്ടെന്ന് കണ്ടെത്തുകയുമായിരുന്നു. ചൊവ്വാഴ്ച രാത്രി ഈ ഉപകരണങ്ങൾ തിരികെ നൽകാൻ എത്തിയ വൈജേഷിനെ തടഞ്ഞുവെച്ച വീട്ടുകാർ വിവരം പോലീസിൽ അറിയിച്ചു. തുടർന്ന് റൂറൽ കൺട്രോൾ റൂം എസ്‌ഐയുടെ നേതൃത്വത്തിൽ സ്ഥലത്തെത്തിയ പോലീസ് സംഘം പ്രതിയെ കസ്റ്റഡിയിലെടുക്കുകയും മെഡിക്കൽ പരിശോധനകൾക്ക് ശേഷം കുണ്ടറ സ്റ്റേഷനിലേക്ക് മാറ്റുകയും ചെയ്തു.
സംഭവം നടന്ന രാത്രി ജനറൽ ഡ്യൂട്ടിയിലുള്ള ഉദ്യോഗസ്ഥനും പാരാവുകാരനും ഉൾപ്പെടെ രണ്ട് പോലീസുകാർ മാത്രമാണ് സ്റ്റേഷനിലുണ്ടായിരുന്നത്. വൈജേഷിനെ ലോക്കപ്പിലാക്കിയെങ്കിലും അതിന്റെ പൂട്ട് ഇടാൻ ഉദ്യോഗസ്ഥർ മറന്നുപോവുകയായിരുന്നു. പാരാവുകാരൻ സുഹൃത്തുമായി സംസാരിച്ചു നിൽക്കുന്നതിനിടെ ലഭിച്ച അവസരം മുതലാക്കി പ്രതി അനായാസം ലോക്കപ്പ് തുറന്ന് പുറത്തേക്ക് കടന്നു. പ്രതി രക്ഷപ്പെട്ട് ഏറെ നേരം കഴിഞ്ഞാണ് പോലീസുകാർക്ക് തങ്ങളുടെ അബദ്ധം മനസ്സിലായത്. കടുത്ത സുരക്ഷാവീഴ്ച വരുത്തിയ ജീവനക്കാർക്കെതിരെ വകുപ്പുതല നടപടികൾ ഉണ്ടായേക്കും. രക്ഷപ്പെട്ട വൈജേഷിനായി കുണ്ടറ പോലീസ് തിരച്ചിൽ ഊർജിതമാക്കിയിട്ടുണ്ട്.
