ആയിരക്കണക്കിന് മൈലുകൾക്കപ്പുറമുള്ള ശത്രുരാജ്യങ്ങളുടെ യുദ്ധവിമാനങ്ങളെ ആകാശത്തുവെച്ചുതന്നെ തകർക്കാൻ ശേഷിയുള്ള അത്യാധുനിക ഹൈപ്പർസോണിക് മിസൈലുകൾ ചൈനീസ് സൈന്യം വികസിപ്പിച്ചതായി റിപ്പോർട്ടുകൾ വ്യക്തമാക്കുന്നു. യുദ്ധക്കളത്തിൽ നേരിട്ട് പങ്കെടുക്കാതെ മാറിനിന്ന് പ്രവർത്തിക്കുന്ന അമേരിക്കൻ വ്യോമസേനയുടെ തന്ത്രപ്രധാന വിമാനങ്ങൾക്ക് ഇത് വലിയ ഭീഷണിയാണ്. മൂവായിരത്തിലധികം ബാലിസ്റ്റിക് മിസൈലുകളുള്ള ചൈന, തങ്ങളുടെ സൈനികബലം വർധിപ്പിക്കുന്നതിന്റെ ഭാഗമായാണ് ഈ പുതിയ പദ്ധതി നടപ്പിലാക്കുന്നത്. ഇന്ധനം നിറയ്ക്കുന്ന ഏരിയൽ ടാങ്കറുകൾ, വ്യോമാക്രമണ മുന്നറിയിപ്പ് നൽകുന്ന അവാക്സ് (AWACS) വിമാനങ്ങൾ, പറക്കുന്ന കമാൻഡ് പോസ്റ്റുകൾ എന്നിവയെ ലക്ഷ്യമിടാൻ പോന്നതാണ് ഈ പുതിയ ആയുധശേഷി.
ഹൈപ്പർസോണിക് ഗ്ലൈഡ് വെഹിക്കിൾ (HGV) സാങ്കേതികവിദ്യ എയർ-ടു-എയർ മിസൈലുകളിൽ സംയോജിപ്പിച്ചു എന്നതാണ് ഇതിന്റെ ഏറ്റവും വലിയ പ്രത്യേകത. അന്തരീക്ഷത്തിലൂടെ സഞ്ചരിക്കുമ്പോൾ ദിശ അതിവേഗം മാറ്റാൻ സാധിക്കുമെന്നതിനാൽ ശത്രുരാജ്യങ്ങളുടെ പ്രതിരോധ സംവിധാനങ്ങൾക്ക് ഇവയെ തടയുക സാധ്യമല്ല. എന്നാൽ, അതിവേഗത്തിൽ സഞ്ചരിക്കുന്ന ഒരു വിമാനത്തെ വളരെ ദൂരെനിന്ന് കൃത്യമായി ലക്ഷ്യം വയ്ക്കുക എന്നത് വലിയ സാമ്പത്തിക ചെലവും സാങ്കേതിക വെല്ലുവിളിയും നിറഞ്ഞതാണ്. റഡാറുകളിൽ നിന്നും സെൻസറുകളിൽ നിന്നുമുള്ള വിവരങ്ങളുടെ അടിസ്ഥാനത്തിലാണ് ഇവ പ്രവർത്തിക്കുന്നത് എന്നതിനാൽ, ഈ വിവരക്കൈമാറ്റ പ്രക്രിയ ശത്രുക്കൾ തടസ്സപ്പെടുത്തിയാൽ മിസൈലിന്റെ കൃത്യതയെ അത് സാരമായി ബാധിക്കും.
