കാനഡയിലെ സ്ഥിരതാമസക്കാർക്ക് തങ്ങളുടെ കുടുംബാംഗങ്ങളെ സ്പോൺസർ ചെയ്യാൻ അനുവദിക്കുന്ന പ്രത്യേക നയം സെപ്റ്റംബർ 10-ന് അവസാനിക്കും. ഈ തീയതിക്ക് ശേഷം സമർപ്പിക്കുന്ന അപേക്ഷകൾ സ്വീകരിക്കില്ലെന്ന് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) വ്യക്തമാക്കി.
കനേഡിയൻ ഇമിഗ്രേഷൻ നിയമപ്രകാരം ആദ്യ അപേക്ഷയിൽ പങ്കാളിയെയോ മക്കളെയോ ഉൾപ്പെടുത്തിയില്ലെങ്കിൽ അവരെ പിന്നീട് രാജ്യത്തേക്ക് സ്പോൺസർ ചെയ്യുന്നതിന് വിലക്കുണ്ട്. എന്നാൽ, ഈ വ്യവസ്ഥ പല കുടുംബങ്ങൾക്കും തിരിച്ചടിയാകുന്നു എന്ന് കണ്ടാണ് 2019-ൽ ഫെഡറൽ സർക്കാർ താൽക്കാലിക ഇളവ് പ്രഖ്യാപിച്ചത്. അഭയാർത്ഥികളായി എത്തിയവർ, കുടുംബ സ്പോൺസർഷിപ്പ് വഴി സ്ഥിരതാമസം നേടിയവർ തുടങ്ങിയ പ്രത്യേക വിഭാഗങ്ങൾക്ക് മാത്രമാണ് ഈ ആനുകൂല്യം ലഭിക്കുക. മറ്റ് സാമ്പത്തിക-തൊഴിൽ കുടിയേറ്റ പദ്ധതികൾ വഴി കാനഡയിലെത്തിയവർക്ക് ഈ ഇളവ് ലഭിക്കില്ല.
ഈ താൽക്കാലിക ഇളവിനായി പ്രത്യേക അപേക്ഷ സമർപ്പിക്കേണ്ടതില്ല. സാധാരണ സ്പോൺസർഷിപ്പ് അപേക്ഷ സമർപ്പിക്കുമ്പോൾത്തന്നെ ഇമിഗ്രേഷൻ ഉദ്യോഗസ്ഥർ ഈ നയത്തിന് കീഴിലുള്ള യോഗ്യത പരിശോധിക്കും. സെപ്റ്റംബർ 10-ന് മുൻപായി അപേക്ഷകൾ ഓൺലൈൻ പോർട്ടൽ വഴി IRCC-ക്ക് ലഭിക്കണം. സെപ്റ്റംബർ 10-ന് ശേഷം ലഭിക്കുന്ന അപേക്ഷകളിൽ എന്നന്നേക്കുമായി വിലക്ക് എന്ന പഴയ നിയമം തന്നെയാകും കാനഡ സർക്കാർ നടപ്പിലാക്കുക.
