1994-ൽ കാനഡയിലെ വാൻകൂവറിൽ നിന്ന് കാണാതായ വ്യക്തിയെ മുപ്പത് വർഷങ്ങൾക്ക് ശേഷം നെതർലാൻഡ്സിലെ ആംസ്റ്റർഡാമിൽ കണ്ടെത്തിയതായി സൂചന. 2023-ൽ ആംസ്റ്റർഡാം തെരുവിൽ ബോധരഹിതനായി വീണ “ലക്കി” എന്നറിയപ്പെടുന്ന വയോധികൻ, കാണാതായ കനേഡിയൻ പൗരൻ ജോൺ റസ്സൽ കെന്നി തന്നെയാണോ എന്ന് തിരിച്ചറിയാൻ വാൻകൂവർ പോലീസും ഡച്ച് പോലീസും ഇന്റർപോളും സംയുക്തമായി അന്വേഷണം ആരംഭിച്ചു.
തലച്ചോറിലെ സ്ട്രോക്കിനെയോ രക്തസ്രാവത്തെയോ തുടർന്ന് സംസാരിക്കാനുള്ള ശേഷി (അഫാസിയ) പൂർണ്ണമായി നഷ്ടപ്പെട്ട നിലയിലാണ് ലക്കി ഇപ്പോൾ ഒരു ഡച്ച് നഴ്സിംഗ് ഹോമിൽ കഴിയുന്നത്. അദ്ദേഹത്തിന്റെ കൈവശം തിരിച്ചറിയൽ രേഖകളൊന്നും ഉണ്ടായിരുന്നില്ല. എന്നാൽ തെരുവുകളിൽ “ക്രിസ് ദി കനേഡിയൻ” എന്ന് അറിയപ്പെട്ടിരുന്ന ഇയാളുടെ ചിത്രങ്ങൾ പുറത്തുവന്നതോടെയാണ്, 1994-ൽ 34-ാം വയസ്സിൽ വാൻകൂവറിൽ നിന്ന് കാണാതായ ജോൺ റസ്സൽ കെന്നിയുമായി സാദൃശ്യമുണ്ടെന്ന് കണ്ടെത്തിയത്.
നിലവിൽ 67 വയസ്സ് പ്രായം പ്രതീക്ഷിക്കുന്ന കെന്നിയെക്കുറിച്ചുള്ള കൂടുതൽ വിവരങ്ങൾ ശേഖരിച്ചു വരികയാണെന്ന് വാൻകൂവർ പോലീസ് അറിയിച്ചു. ആംസ്റ്റർഡാം പോലീസിലെ വിരമിച്ച ഉദ്യോഗസ്ഥർ നടത്തിയ അന്വേഷണത്തിൽ ഇയാൾ അവിടുത്തെ ഒരു ബുദ്ധമത സമൂഹത്തിൽ പ്രവർത്തിച്ചിരുന്നതായും കണ്ടെത്തിയിട്ടുണ്ട്. ഡിഎൻഎ പരിശോധന ഉൾപ്പെടെയുള്ള നടപടികളിലൂടെ വ്യക്തിത്വം സ്ഥിരീകരിച്ച ശേഷം ഔദ്യോഗിക പ്രതികരണം നടത്തുമെന്നാണ് അധികൃതർ വ്യക്തമാക്കുന്നത്.
