80-ാം സ്വാതന്ത്ര്യദിനത്തിൽ ഡൽഹിയിലെ ചെങ്കോട്ടയിൽ വെച്ച് രാജ്യത്തെ അഭിസംബോധന ചെയ്ത പ്രധാനമന്ത്രി നരേന്ദ്ര മോദി, 2047-ഓടെ ഇന്ത്യയെ ഒരു വികസിത രാഷ്ട്രമാക്കി മാറ്റുക എന്ന വലിയ ലക്ഷ്യം ഊന്നിപ്പറഞ്ഞു. രാജ്‌ഘട്ടിൽ പുഷ്പാർച്ചന നടത്തിയ ശേഷം ചെങ്കോട്ടയിലെത്തിയ അദ്ദേഹം, പതാക ഉയർത്തുന്നതിന് മുന്നോടിയായി വന്ദേമാതരത്തിന്റെ 150-ാം വാർഷികത്തോടനുബന്ധിച്ച് ചരിത്രത്തിലാദ്യമായി അവിടെ മുഴങ്ങിക്കേട്ട ദേശീയ ഗീതത്തെക്കുറിച്ചും ദേശീയഗാനത്തെക്കുറിച്ചും പരാമർശിച്ചു. വലിയ സ്വപ്നങ്ങളും വീക്ഷണങ്ങളുമാണ് ചിന്തകളെയും കഴിവുകളെയും വികസിപ്പിക്കുന്നതെന്നും, അത് വെല്ലുവിളികളെ അതിജീവിച്ച് മുന്നേറാനുള്ള കരുത്ത് നൽകുമെന്നും അദ്ദേഹം വ്യക്തമാക്കി.
കഴിഞ്ഞ 12 വർഷത്തിനിടെ കൈവരിച്ച മികച്ച നേട്ടങ്ങളാണ് രാജ്യത്തെ പുതിയ ഉയരങ്ങളിലേക്ക് നയിച്ചതെന്ന് അദ്ദേഹം ചൂണ്ടിക്കാട്ടി. ചുരുങ്ങിയ കാലയളവിനുള്ളിൽ 25 കോടിയോളം ജനങ്ങളെ ദാരിദ്ര്യത്തിൽ നിന്ന് കരകയറ്റാനും, ഡിജിറ്റൽ രംഗത്ത് അഭൂതപൂർവമായ മുന്നേറ്റമുണ്ടാക്കാനും, ഹൈഡ്രജൻ ട്രെയിൻ പോലുള്ള സാങ്കേതികവിദ്യകൾ നടപ്പിലാക്കാനും ഇന്ത്യയ്ക്ക് സാധിച്ചു. കോവിഡ് കാലത്തെ വ്യാജപ്രചാരണങ്ങളെ അതിജീവിച്ച രാജ്യം, കാലഹരണപ്പെട്ട നിയമങ്ങൾ നീക്കം ചെയ്തും സ്ഥിരതയുള്ള ഭരണത്തിലൂടെ വിദേശ രാജ്യങ്ങളുമായി സ്വതന്ത്ര വ്യാപാര കരാറുകൾ ഒപ്പിട്ടും ആഗോളതലത്തിൽ വലിയ ബഹുമാനം നേടിയെടുത്ത ഒരു പ്രധാന സാമ്പത്തിക ശക്തിയായി മാറിയിരിക്കുകയാണ്. ഇന്ത്യയുടെ ഭാവിയും സാമ്പത്തിക വളർച്ചയും നിർണയിക്കുന്നത് ‘സപ്തധാരകൾ’ എന്ന് വിശേഷിപ്പിച്ച ഏഴ് പ്രധാന മേഖലകളാണ്. ഉൽപ്പാദനം, കർഷകക്ഷേമം, സാങ്കേതികവിദ്യ, ഗതാഗതവും കണക്ടിവിറ്റിയും, പ്രതിരോധ മേഖല, ഹരിത ഊർജം, അതുപോലെ യോഗയും കരകൗശല വിദ്യയും സിനിമയും അടങ്ങുന്ന സോഫ്റ്റ് പവർ എന്നിവയാണ് ഈ പ്രധാന മേഖലകൾ. മറ്റുള്ള രാജ്യങ്ങളെ ആശ്രയിക്കാതെ, ആത്മനിർഭർ ഭാരതമെന്ന ആശയം മുൻനിർത്തി ഓരോ പൗരനും സ്വയംപര്യാപ്തത കൈവരിക്കണമെന്ന് ആഹ്വാനം ചെയ്തുകൊണ്ടാണ് പ്രധാനമന്ത്രി തന്റെ പ്രസംഗം അവസാനിപ്പിച്ചത്.
