ഇന്ത്യൻ രാഷ്ട്രീയത്തിൽ വലിയ കൊടുങ്കാറ്റ് സൃഷ്ടിക്കുകയും ദീർഘകാലം വാർത്തകളിൽ നിറഞ്ഞുനിൽക്കുകയും ചെയ്ത ബോഫോഴ്‌സ് അഴിമതിക്കേസിലെ നിയമനടപടികൾക്ക് സുപ്രീംകോടതിയുടെ അന്തിമ വിധിയിലൂടെ പരിസമാപ്തിയായി. പ്രതികളെ കുറ്റവിമുക്തരാക്കിയ 2005-ലെ ഡൽഹി ഹൈക്കോടതി വിധിക്കെതിരെ സമർപ്പിച്ച അവസാന അപ്പീലും സുപ്രീംകോടതി നിരസിക്കുകയായിരുന്നു. ജസ്റ്റിസ് ജെ.ബി. പർദിവാല, ജസ്റ്റിസ് കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് അഭിഭാഷകൻ അജയ് കെ. അഗർവാൾ നൽകിയ ഹർജി പരിഗണിച്ചത്. കേസ് നീട്ടിവെക്കണമെന്ന ആവശ്യം തള്ളിയ കോടതി, വർഷങ്ങൾ കഴിഞ്ഞ കേസിൽ ഇനി എന്ത് നടപടിയാണ് ബാക്കിയുള്ളതെന്ന് ചോദിച്ചുകൊണ്ട് ഹർജി അന്തിമമായി തള്ളുകയായിരുന്നു.

1986-ൽ സ്വീഡിഷ് കമ്പനിയായ എ.ബി. ബോഫോഴ്‌സുമായി ഇന്ത്യ ഒപ്പുവെച്ച 1,437 കോടി രൂപയുടെ ഹൊവിറ്റ്‌സർ തോക്ക് ഇടപാടിൽ 64 കോടി രൂപയുടെ കോഴപ്പണം കൈമാറ്റം ചെയ്യപ്പെട്ടെന്ന ആരോപണമാണ് ഈ കേസിന് വഴിവെച്ചത്. രാജീവ് ഗാന്ധി സർക്കാരിന്റെ കാലത്തുയർന്ന ഈ വിവാദം 1989-ലെ പൊതുതിരഞ്ഞെടുപ്പിൽ കോൺഗ്രസിന്റെ തോൽവിക്ക് പ്രധാന കാരണമായി മാറിയിരുന്നു. എന്നാൽ ദശാബ്ദങ്ങൾ നീണ്ട നിയമപോരാട്ടങ്ങൾക്കൊടുവിൽ, ഹിന്ദുജ സഹോദരന്മാർ ഉൾപ്പെടെയുള്ളവർക്ക് ആശ്വാസമേകി കേസിന് സുപ്രീംകോടതി പൂർണ്ണമായി തിരശ്ശീലയിട്ടു.