ന്യൂയോർക്ക് നഗരത്തിലുടനീളം അപകടമുണ്ടാക്കുന്ന ഇ-ബൈക്കുകളെ തടയുന്നതിനായി ഏകദേശം പത്തോളം നിയമനിർമ്മാണ നടപടികളുമായി മുന്നോട്ട് പോവുകയാണ് ന്യൂയോർക്ക് സിറ്റി കൗൺസിൽ. കാൽനടയാത്രക്കാരുടെ സുരക്ഷ ഉറപ്പാക്കുന്നതിന് ശക്തമായ പരിശോധനകളും മേൽനോട്ടവും വേണമെന്ന് ജനപ്രതിനിധികൾ ആവശ്യപ്പെട്ടു.
ഇ-ബൈക്കുകൾ സൃഷ്ടിക്കുന്ന ബുദ്ധിമുട്ടുകൾ പരിഹരിക്കുന്നതിനായി അടുത്ത മാസം ഒരു പരിശോധനാ യോഗം (Oversight hearing) ചേരുമെന്നും സമഗ്രമായ പഠനം നടത്തുമെന്നും കൗൺസിൽ ചൊവ്വാഴ്ച അറിയിച്ചു.
“നിലവിൽ തന്നെ നമ്മുടെ പക്കൽ നിയമങ്ങളുണ്ട്, എന്നാൽ അവ കൃത്യമായി നടപ്പിലാക്കുന്നില്ല. ന്യൂയോർക്ക് നിവാസികളുടെ സുരക്ഷ ഉറപ്പാക്കാൻ കൂടുതൽ നിയമനിർമ്മാണങ്ങൾ ആവശ്യമുണ്ടോ എന്ന് പരിശോധിക്കേണ്ടതുണ്ട്,” കൗൺസിൽ സ്പീക്കർ ജൂലി മെനിൻ പറഞ്ഞു.
“നമ്മുടെ റോഡുകൾ കൂടുതൽ സുരക്ഷിതമാക്കുന്നതിനുള്ള എല്ലാ വഴികളും പരിശോധിക്കുന്നതിനായി കാൽനടയാത്രക്കാർ, സൈക്കിൾ യാത്രക്കാർ, ഡെലിവറി തൊഴിലാളികൾ, ഗതാഗത വിദഗ്ദ്ധർ, സുരക്ഷാ പ്രവർത്തകർ, നിയമപാലക ഏജൻസികൾ എന്നിവരെ സിറ്റി കൗൺസിൽ ഒരുമിച്ച് കൊണ്ടുവരും.”
അപകടകരമായി ഇ-ബൈക്ക് ഓടിക്കുന്നവരെ തടയുന്നതിനായി ഈ വർഷം അവതരിപ്പിച്ച ബിൽ പാക്കേജിന്റെ ഭാഗമായാണ് ചൊവ്വാഴ്ചയോടെ ഈ നീക്കങ്ങൾ വീണ്ടും ശക്തമാക്കിയത്.
കൗൺസിൽ അംഗം ലിൻ ഷുൾമാൻ നിർദ്ദേശിച്ച ഒരു നിയമപ്രകാരം, തേർഡ് പാർട്ടി ഡെലിവറി ആപ്പുകൾ ഡിപ്പാർട്ട്മെന്റ് ഓഫ് കൺസ്യൂമർ ആൻഡ് വർക്കർ പ്രൊട്ടക്ഷനിൽ രജിസ്റ്റർ ചെയ്യണം. ഇത് അനിയന്ത്രിതമായി വാഹനമോടിക്കുന്ന ഡെലിവറി ഡ്രൈവർമാർക്ക് മേൽ നഗരസഭയ്ക്ക് കൂടുതൽ മേൽനോട്ടവും നടപടിയെടുക്കാനുള്ള അധികാരവും നൽകും.
ഡെലിവറി ആപ്പുകൾ തങ്ങളുടെ ഡ്രൈവർമാരുടെ വിവരങ്ങൾ ശേഖരിക്കണമെന്നും നഗരത്തിലുടനീളം അവരുടെ സഞ്ചാരം ട്രാക്ക് ചെയ്യണമെന്നും കൗൺസിൽ അംഗം ഗെയ്ൽ ബ്രൂവർ മുന്നോട്ടുവെച്ച മറ്റൊരു ബില്ലിൽ ആവശ്യപ്പെടുന്നു.
വരും ആഴ്ചകളിൽ അടിസ്ഥാന സൗകര്യങ്ങളിലെ മാറ്റങ്ങൾ, ഇൻഷുറൻസ് മാനദണ്ഡങ്ങൾ, നിയമപാലനം എന്നിവ വഴി നിയമവിരുദ്ധ ഇ-ബൈക്കുകളെ തടയാനായി കൂടുതൽ ബില്ലുകൾ ജനപ്രതിനിധികൾ അവതരിപ്പിക്കുമെന്നാണ് പ്രതീക്ഷിക്കുന്നത്.
“പേടി കൂടാതെ റോഡ് മുറിച്ചുകടക്കാൻ ഓരോ ന്യൂയോർക്ക് നിവാസിക്കും അവകാശമുണ്ട്. തങ്ങൾ വാങ്ങുന്ന വാഹനം സുരക്ഷിതമാണെന്ന് അറിയാൻ ഓരോ റൈഡർക്കും, അപകടകരമായി വാഹനം ഓടിക്കാൻ നിർബന്ധിതരാകാതെ ജീവനോപാധി കണ്ടെത്താൻ ഓരോ ഡെലിവറി തൊഴിലാളിക്കും അവകാശമുണ്ട്,” ഗതാഗത സാങ്കേതിക സമിതി അധ്യക്ഷനും ഭൂരിപക്ഷ നേതാവുമായ ഷോൺ അബ്രെയു പറഞ്ഞു.
“അമിത വേഗതയിലൂടെ ലാഭമുണ്ടാക്കുന്ന കമ്പനികൾക്ക് ഉത്തരവാദിത്തം നിശ്ചയിക്കാനും, വേഗതയേറിയതും നിയമവിരുദ്ധവുമായ വാഹനങ്ങൾ റോഡിൽ നിന്ന് ഒഴിവാക്കാനും, നിയമവിധേയമായവ കൂടുതൽ സുരക്ഷിതമാണെന്ന് ഉറപ്പാക്കാനും ഈ നിയമനിർമ്മാണ പാക്കേജ് സഹായിക്കും.”
