ഇന്നത്തെ തലമുറ ഭക്ഷണകാര്യങ്ങളിൽ, പ്രത്യേകിച്ച് പ്രോട്ടീൻ അടങ്ങിയ ആഹാരം തിരഞ്ഞെടുക്കുന്നതിൽ വലിയ ശ്രദ്ധ പുലർത്തുന്നുണ്ട്. എന്നാൽ, കൃത്യമായ വ്യായാമമില്ലാതെ അമിതമായി പ്രോട്ടീൻ കഴിക്കുന്നത് ആരോഗ്യത്തിന് ഗുണത്തേക്കാളേറെ ദോഷം ചെയ്യുമെന്നാണ് സെൽപ്രസ് ബ്ലൂ ജേണലിൽ പ്രസിദ്ധീകരിച്ച പുതിയ പഠനം വ്യക്തമാക്കുന്നത്. അമേരിക്കയിലെ വിസ്‌കോൺസിൻ മാഡിസൺ സർവകലാശാലയിലെ ഗവേഷകരുടെ കണ്ടെത്തലനുസരിച്ച്, ശാരീരിക അധ്വാനമില്ലാത്തവർ ആഹാരത്തിൽ പ്രോട്ടീന്റെ അളവ് പരിമിതപ്പെടുത്തുന്നതാണ് കൂടുതൽ അഭികാമ്യം.
പേശികളുടെ വളർച്ചയ്ക്ക് പ്രോട്ടീൻ അത്യാവശ്യമാണെങ്കിലും, വ്യായാമരഹിതമായ ജീവിതശൈലി നയിക്കുന്നവരിൽ അമിത പ്രോട്ടീൻ വിപരീതഫലമാണ് ഉണ്ടാക്കുന്നത്. ആഹാരത്തിൽ പ്രോട്ടീന്റെ അളവ് നിയന്ത്രിക്കുന്നത് ശരീരത്തിലെ മെറ്റബോളിസം മെച്ചപ്പെടുത്താനും, കോശങ്ങളുടെ ആരോഗ്യം നിലനിർത്തി വാർദ്ധക്യ സഹജമായ വ്യതിയാനങ്ങൾ മന്ദഗതിയിലാക്കാനും സഹായിക്കും. കൂടാതെ, പ്രോട്ടീൻ അളവ് കുറയുമ്പോൾ ശരീരത്തിൽ ഉൽപ്പാദിപ്പിക്കപ്പെടുന്ന ‘ഫൈബ്രോബ്ലാസ്റ്റ് ഗ്രോത്ത് ഫാക്ടർ 21’ (FGF21) എന്ന ഹോർമോൺ ഊർജ്ജ ഉപയോഗം കൂട്ടുകയും, രക്തത്തിലെ പഞ്ചസാരയുടെ അളവ് ക്രമീകരിച്ച് വീക്കങ്ങൾ (inflammation) കുറയ്ക്കുകയും ചെയ്യുന്നു.
ഗർഭിണികൾക്കും പ്രായമായവർക്കും കായികതാരങ്ങൾക്കും ഉയർന്ന അളവിൽ പ്രോട്ടീൻ ആവശ്യമെന്നത് ശരിയാണെങ്കിലും, വ്യായാമം ചെയ്യുന്നതുകൊണ്ടാണ് കായികതാരങ്ങൾക്ക് മെറ്റബോളിക് രോഗങ്ങൾ വരാതിരിക്കുന്നത്. അതിനാൽ, കേവലം പ്രോട്ടീൻ അടങ്ങിയ ഭക്ഷണം മാത്രം കഴിക്കാതെ, സ്വന്തം ശാരീരിക അധ്വാനത്തിന്റെയും സജീവതയുടെയും അടിസ്ഥാനത്തിൽ വേണം പ്രോട്ടീന്റെ അളവ് നിശ്ചയിക്കാൻ.
