കനേഡിയൻ ഉൽപ്പന്നങ്ങൾക്ക് അമേരിക്ക 50 ശതമാനം തീരുവ പ്രഖ്യാപിച്ച സാഹചര്യത്തിൽ മറുപടിയായി അമേരിക്കൻ മദ്യത്തിന് നിരോധനം ഏർപ്പെടുത്തില്ലെന്ന് വ്യക്തമാക്കി ആൽബർട്ട പ്രീമിയർ ഡാനിയൽ സ്മിത്ത്. മുമ്പ് പ്രഖ്യാപിച്ച നിരോധനം പിൻവലിച്ചിട്ടുണ്ടെന്നും എന്നാൽ, വീണ്ടും അത്തരമൊരു നടപടി ഉണ്ടാകില്ലെന്നും പ്രീമിയർ അറിയിച്ചു. യുഎസ് ഉൽപ്പന്നങ്ങൾ വാങ്ങുന്നത് വ്യാപാരികളുടെയും ഉപഭോക്താക്കളുടെ തീരുമാനമാണെന്നും ഡാനിയൽ സ്മിത്ത് പറയുന്നു.
ഇരുരാജ്യങ്ങളും തമ്മിൽ വ്യാപാര തർക്കങ്ങൾ പരിഹരിക്കുന്നതിനായി പ്രധാനമന്ത്രി മാർക്ക് കാർണിയുടെ നേതൃത്വത്തിൽ യുഎസുമായി ചർച്ചകൾ പുരോഗമിക്കുകയാണ്. അടുത്ത മാസത്തോടെ പുതിയ താരിഫ് നിലവിൽ വരാനിരിക്കെ, ഇരു രാജ്യങ്ങളും തമ്മിൽ അനുകൂലമായ കരാറിലെത്താൻ സാധിക്കുമെന്ന് പ്രതീക്ഷിക്കുന്നതായി ഡാനിയൽ സ്മിത്ത് പറഞ്ഞു. യുഎസ് താരിഫിനെതിരെ മറ്റ് കനേഡിയൻ പ്രവിശ്യകൾ കർശന നിലപാടുകളുമായി മുന്നോട്ട് പോകുമ്പോൾ, വിപണിയിലെ തടസ്സങ്ങൾ ഒഴിവാക്കി നയതന്ത്ര മാർഗ്ഗത്തിലൂടെ ഉഭയകക്ഷി ബന്ധം നിലനിർത്താനാണ് തങ്ങൾ ശ്രമിക്കുന്നതെന്നും പ്രീമിയർ പറയുന്നു.
