ലോകമെമ്പാടുമുള്ള ദശലക്ഷക്കണക്കിന് ഉപയോക്താക്കളെ ബുദ്ധിമുട്ടിലാക്കിക്കൊണ്ട് പ്രമുഖ എ.ഐ സേവനമായ ചാറ്റ്ജിപിറ്റിയുടെ (ChatGPT) പ്രവർത്തനം വീണ്ടും വ്യാപകമായി തടസ്സപ്പെട്ടു. യു.എ.ഇ, യു.എസ്, യൂറോപ്പ്, ഇന്ത്യ, ജപ്പാൻ, ഓസ്‌ട്രേലിയ തുടങ്ങിയ നിരവധി രാജ്യങ്ങളിലെ ഉപയോക്താക്കളാണ് സർവ്വറുകൾ ലഭ്യമല്ലെന്ന തരത്തിലുള്ള കണക്റ്റിവിറ്റി പ്രശ്നങ്ങൾ നേരിടുന്നത്. ചാറ്റ്ജിപിറ്റിയുടെ വെബ് ആപ്പ്, മൊബൈൽ ആപ്ലിക്കേഷൻ, ഡെവലപ്പർ എ.പി.ഐ (API) പ്ലാറ്റ്‌ഫോം എന്നിവയെല്ലാം ഈ തടസ്സത്തിൽ ബാധിക്കപ്പെട്ടിട്ടുണ്ട്. പ്രശ്നം ശ്രദ്ധയിൽപ്പെട്ടിട്ടുണ്ടെന്നും ഇതിനു പിന്നിലെ സാങ്കേതിക തകരാറുകളെക്കുറിച്ച് അന്വേഷണം നടന്നു വരികയാണെന്നും കമ്പനിയുടെ ഔദ്യോഗിക പ്ലാറ്റ്‌ഫോം വഴി ഓപ്പൺഎഐ സ്ഥിരീകരിച്ചു.
സേവന തടസ്സങ്ങൾ നിരീക്ഷിക്കുന്ന ഡൗൺഡിറ്റക്ടർ (DownDetector) നൽകുന്ന വിവരമനുസരിച്ച്, ചുരുങ്ങിയ സമയത്തിനുള്ളിൽ പതിനായിരക്കണക്കിന് പരാതികളാണ് ഉപയോക്താക്കളിൽ നിന്ന് ലഭിച്ചത്. യു.എ.ഇയിൽ ഉച്ചയ്ക്ക് ശേഷം റിപ്പോർട്ട് ചെയ്യപ്പെട്ട പരാതികളിൽ ഭൂരിഭാഗവും ചാറ്റ്ജിപിറ്റിയുടെ പ്രധാന പ്രവർത്തനങ്ങളെയും ആപ്പ് സേവനങ്ങളെയും ബാധിച്ചവയാണ്. ഇന്ത്യയിലും പരാതിക്കാരുടെ എണ്ണം ആയിരം കടന്ന് അതിവേഗം ഉയർന്നുകൊണ്ടിരിക്കുകയാണ്. എ.പി.ഐ അധിഷ്ഠിതമായി പ്രവർത്തിക്കുന്ന ഡെവലപ്പർമാരെയും ആപ്പ് സബ്‌സ്‌ക്രൈബർമാരെയും ഇത് കാര്യമായി ബാധിച്ചിട്ടുണ്ട്.
ഏതാനും ആഴ്ചകൾക്ക് മുമ്പും ചാറ്റ്ജിപിറ്റിയിൽ സമാനമായ രീതിയിൽ താൽക്കാലിക തടസ്സങ്ങൾ ഉണ്ടായിരുന്നു. ചിത്രങ്ങൾ നിർമ്മിക്കുന്നതിലും കോഡിംഗ് സേവനങ്ങളിലുമായിരുന്നു അന്ന് പ്രധാനമായും തകരാറുകൾ കണ്ടത്. നിലവിലെ തടസ്സം എന്ന് പൂർണ്ണമായി പരിഹരിക്കാൻ കഴിയുമെന്നതിനെക്കുറിച്ച് ഓപ്പൺഎഐ ഔദ്യോഗിക സമയക്രമം ഒന്നും പുറത്തുവിട്ടിട്ടില്ലെങ്കിലും, സെർവർ തകരാറുകൾ പരിഹരിക്കപ്പെടുന്നതോടെ സേവനങ്ങൾ ഉടൻ തന്നെ സാധാരണ നിലയിലാകുമെന്നാണ് പ്രതീക്ഷിക്കുന്നത്.
