അതിവേഗം കത്തിപ്പടരുന്ന കാട്ടുതീയെ തുടർന്ന് ബ്രിട്ടീഷ് കൊളംബിയയുടെ തെക്കുകിഴക്കൻ മേഖലയിൽ ഒഴിപ്പിക്കൽ ഉത്തരവ് നൽകി. പ്രവിശ്യയുടെ ആൽബർട്ട അതിർത്തിക്കടുത്തുള്ള കിംബർലി നഗരത്തിലാണ് ഒഴിപ്പിക്കൽ ജാഗ്രതാ നിർദ്ദേശം നൽകിയത്. ആളുകൾ ഒഴിഞ്ഞുപോകാൻ തയ്യാറായിരിക്കണമെന്ന് നിർദ്ദേശം നൽകിയതായി ഈസ്റ്റ് കൂട്ടെനെ റീജിയണൽ ഡിസ്ട്രിക്റ്റ് അറിയിച്ചു. വാരാന്ത്യത്തിൽ ഇടിമിന്നലിനെ തുടർന്ന് ആരംഭിച്ച കാട്ടുതീ ഇതുവരെ ഏകദേശം ആറ് ചതുരശ്ര കിലോമീറ്റർ വിസ്തൃതിയിൽ പടർന്നിട്ടുണ്ട്.

കുത്തനെയുള്ള പർവതപ്രദേശങ്ങളിൽ കത്തിപ്പടരുന്നതിനാൽ കാട്ടുതീ നിയന്ത്രണ പ്രവർത്തനങ്ങൾ ദുഷ്കരമാണെന്ന് കിംബർലിയുടെ ആക്ടിംഗ് മേയർ സാന്ദ്ര റോബർട്ട്സ് പറയുന്നു. ഇതിനാൽ പ്രദേശവാസികൾക്ക് കഴിയുന്നത്ര വേഗത്തിൽ അറിയിപ്പ് നൽകുമെന്നും എന്നാൽ തീപിടുത്തത്തിന്‍റെ അവസ്ഥ വേഗത്തിൽ മാറിക്കൊണ്ടിരിക്കുകയാണെന്നും അവർ അറിയിച്ചു.

ബ്രിട്ടീഷ് കൊളംബിയയിൽ സജീവമായ തീപിടുത്തങ്ങളുടെ എണ്ണം വാരാന്ത്യത്തിൽ ഏകദേശം 102 ആയി ഉയർന്നതായി ബിസി വൈൽഡ്‌ഫയർ സർവീസ് പറയുന്നു. അനിയന്ത്രിതമായി പടരുന്ന കാട്ടുതീയെ തുടർന്ന് ഫ്രേസർ കാന്യോണിലെ ബോസ്റ്റൺ ബാർ പ്രദേശത്ത് ജനങ്ങളെ ഒഴിപ്പിക്കുകയും ജാഗ്രതാ നിർദ്ദേശം നൽകുകയും ചെയ്തിട്ടുണ്ട്.