ബെറി പഴ സീസൺ ആരംഭിച്ചതോടെ ജാസ്പർ നാഷണൽ പാർക്കിൽ കരടികളുടെ സാന്നിധ്യവും ആക്രണമണ സാധ്യതയും വർധിച്ചതായി പാർക്സ് കാനഡ മുന്നറിയിപ്പ് നൽകി. പാർക്കിലെത്തുന്ന സന്ദർശകർ അതീവ ജാഗ്രത പാലിക്കണമെന്ന് അധികൃതർ ആവശ്യപ്പെട്ടു. നടപ്പാതകൾ, റോഡരികുകൾ, കാംപിങ് പ്രദേശങ്ങൾ എന്നിവയ്ക്ക് സമീപമുള്ള കാടുകളിലെ ബെറി പഴങ്ങൾ തിന്നാൻ കരടികൾ കൂട്ടത്തോടെ എത്തുമെന്നും സന്ദർശകർ ശ്രദ്ധിക്കണമെന്നും അധികൃതർ നിർദ്ദേശിച്ചു. ക്ഷണത്തിൽ മാത്രം ശ്രദ്ധ കേന്ദ്രീകരിച്ചിരിക്കുന്നതിനാൽ, ആളുകൾ അരികിലെത്തുന്നത് കരടികൾ പെട്ടെന്ന് തിരിച്ചറിയണമെന്നില്ല. ഇത് അപകടസാധ്യത വർധിപ്പിക്കുന്നു.
അപകടങ്ങൾ ഒഴിവാക്കാനായി കാട്ടുപാതകളിലൂടെ നടക്കുമ്പോൾ പരസ്പരം സംസാരിച്ചോ മറ്റോ ശബ്ദമുണ്ടാക്കുന്നത് കരടികൾ മാറിപ്പോകാൻ സഹായിക്കും. ഒറ്റയ്ക്ക് പോകാതെ എപ്പോഴും ഗ്രൂപ്പുകളായി മാത്രം യാത്ര ചെയ്യുക. കാടുകൾ നിറഞ്ഞ പാതകളിലൂടെ ഓടുകയോ സൈക്കിൾ ചവിട്ടുകയോ ചെയ്യുമ്പോൾ വേഗത കുറയ്ക്കുക. കരടികളെ അകറ്റാനുള്ള ‘ബെയർ സ്പ്രേ’ എപ്പോഴും കൈയെത്തും ദൂരത്ത് കരുതുകയും അത് ഉപയോഗിക്കേണ്ട രീതി അറിഞ്ഞിരിക്കുകയും ചെയ്യുക.
യാത്രയ്ക്കിടയിൽ കരടിയുമായി മുഖാമുഖം വന്നാൽ യാതൊരു കാരണവശാലും പരിഭ്രാന്തരാകുകയോ ഓടുകയോ ചെയ്യരുത്. ഓടുന്നത് കരടികളെ കൂടുതൽ അക്രമാസക്തരാക്കാൻ കാരണമാകും. പകരം ശാന്തത പാലിച്ചു കൊണ്ട് പതുക്കെ പിന്നോട്ട് മാറുകയാണ് വേണ്ടത്. സന്ദർശകരുടെയും വന്യജീവികളുടെയും സുരക്ഷ ഉറപ്പാക്കാൻ ഈ മുൻകരുതലുകൾ കർശനമായി പാലിക്കണമെന്ന് അധികൃതർ വ്യക്തമാക്കി.
