യുഎസിൽ എഫ്-1 (F-1) വിസയിൽ പഠിക്കുന്ന മൂന്ന് ലക്ഷത്തിലധികം ഇന്ത്യൻ വിദ്യാർത്ഥികളെ ബാധിക്കുന്ന പുതിയ നിയന്ത്രണവുമായി ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS) രംഗത്തെത്തി. പുതിയ നിയമപ്രകാരം വിദ്യാർത്ഥികൾ ‘ഓട്ടോമാറ്റിക്’ ആയി പുതിയ സംവിധാനത്തിലേക്ക് മാറേണ്ടിവരുമെന്നും അവരുടെ ‘അനുവദനീയമായ താമസം പരമാവധി നാല് വർഷമായി പരിമിതപ്പെടുത്തുമെന്നും’ മന്ത്രാലയം വ്യക്തമാക്കുന്നു. ഈ നിയമം എഫ്-1 പദവിയെ മാത്രമല്ല, കോഴ്സിന് ശേഷമുള്ള ഓപ്ഷണൽ പ്രാക്ടിക്കൽ ട്രെയിനിംഗിനെയും (OPT) ബാധിക്കുമെന്ന് വിദഗ്ധർ ചൂണ്ടിക്കാണിക്കുന്നു. വരാനിരിക്കുന്ന സെപ്റ്റംബർ പകുതിയോടെ നിയമം പ്രാബല്യത്തിൽ വരുന്നതോടെ മാത്രമേ കൂടുതൽ വ്യക്തത വരികയുള്ളൂവെങ്കിലും, നിലവിലുള്ള വിദ്യാർത്ഥികൾക്ക് ഇത് കാര്യങ്ങൾ സങ്കീർണ്ണമാക്കുമെന്നാണ് വിദഗ്ദ്ധ പക്ഷം.
അന്താരാഷ്ട്ര വിദ്യാർത്ഥികൾ യുഎസിൽ നിയമപരമായ പദവി നിലനിർത്തുന്ന രീതിയെ ഈ നിയമം അടിസ്ഥാനപരമായി മാറ്റുമെന്ന് ബെംഗളൂരു ആസ്ഥാനമായുള്ള ലോ ഫേമിലെ യുഎസ് ഇമിഗ്രേഷൻ അഡ്വൈസർ സുകന്യ രാമൻ പറയുന്നു. മുൻപ് അക്കാദമിക് പ്രോഗ്രാമുകൾ പൂർത്തിയാക്കുന്നതുവരെ എഫ്-1 വിസയിൽ തുടരാൻ അനുവാദമുണ്ടായിരുന്ന സ്ഥാനത്ത്, ഇനി മുതൽ വിദ്യാർത്ഥികൾക്ക് നിശ്ചിത സമയപരിധികൾ നേരിടേണ്ടി വരുമെന്നും ദീർഘകാല കോഴ്സുകൾ പൂർത്തിയാക്കാൻ താമസ കാലാവധി നീട്ടുന്നതിനായി (extension of stay) അപേക്ഷ നൽകേണ്ടി വരുമെന്നും അവർ വ്യക്തമാക്കി. വിദേശ വിദ്യാർത്ഥികൾക്കും എക്സ്ചേഞ്ച് സന്ദർശകർക്കും മാധ്യമ പ്രതിനിധികൾക്കും അധിക പരിശോധനകളില്ലാതെ താമസം നീട്ടാൻ അനുവദിച്ചിരുന്ന ‘ഡ്യൂറേഷൻ ഓഫ് സ്റ്റാറ്റസ് (D/S)’ എന്ന വ്യവസ്ഥയാണ് ഡിഎച്ച്എസ് റദ്ദാക്കിയത്.
മുൻപ് എഫ് (വിദ്യാർത്ഥി വിസ), ജെ (എക്സ്ചേഞ്ച് വിസിറ്റർ വിസ) വിസയുള്ളവർക്ക് പഠനം തുടരുന്നിടത്തോളം കാലം യുഎസിൽ തുടരാമായിരുന്നു. കോഴ്സ് പൂർത്തിയാക്കാൻ കൂടുതൽ സമയം വേണമെങ്കിൽ വിദ്യാഭ്യാസ സ്ഥാപനത്തോട് കാലാവധി നീട്ടി ചോദിക്കാമായിരുന്നു. എന്നാൽ പുതിയ നിയമപ്രകാരം, കോഴ്സിന്റെ ദൈർഘ്യത്തിനനുസരിച്ച് പരമാവധി നാല് വർഷത്തെ പ്രാരംഭ പ്രവേശന കാലാവധി മാത്രമേ വിദ്യാർത്ഥികൾക്ക് ലഭിക്കൂ. അതിൽ കൂടുതൽ സമയമെടുക്കുന്നവർ യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിന് (USCIS) ഔദ്യോഗികമായി അപേക്ഷ സമർപ്പിക്കണം. കൂടാതെ, കോഴ്സ് കഴിഞ്ഞ ശേഷം രാജ്യം വിടാനോ പദവി മാറ്റാനോ നൽകിയിരുന്ന ഗ്രേസ് പിരീഡ് 60 ദിവസത്തിൽ നിന്നും 30 ദിവസമായി പകുതിയായി കുറയ്ക്കുകയും ചെയ്തു. പിഎച്ച്ഡി, മെഡിക്കൽ, റിസർച്ച് തുടങ്ങിയ ദീർഘകാല കോഴ്സുകൾ ചെയ്യുന്നവർക്ക് ഇത് വലിയ സാമ്പത്തിക ബാധ്യതയ്ക്കും അപേക്ഷാ കാലതാമസം മൂലമുള്ള പദവി നഷ്ടപ്പെടലിനും കാരണമായേക്കാം.
2025 ജനുവരിയിലെ കണക്കനുസരിച്ച് യുഎസിൽ ഏകദേശം 3 ലക്ഷത്തോളം ഇന്ത്യൻ വിദ്യാർത്ഥികളുണ്ട്, ഇതിൽ ഭൂരിഭാഗവും സ്റ്റെം (STEM – സയൻസ്, ടെക്നോളജി, എൻജിനീയറിങ്, മാത്തമാറ്റിക്സ്) കോഴ്സുകളിൽ ബിരുദാനന്തര ബിരുദം ചെയ്യുന്നവരാണ്. യുഎസ് സ്റ്റേറ്റ് ഡിപ്പാർട്ട്മെന്റിന്റെ റിപ്പോർട്ട് പ്രകാരം 2024-ൽ മാത്രം 90,129 ഇന്ത്യക്കാർക്ക് എഫ് വിസ ലഭിച്ചിട്ടുണ്ട്. എന്നാൽ കുടിയേറ്റ വ്യവസ്ഥകളിലെ ദുരുപയോഗം തടയുന്നതിനും ദേശീയ സുരക്ഷ ശക്തമാക്കുന്നതിനുമാണ് ഈ മാറ്റമെന്നാണ് യുഎസ് സർക്കാരിന്റെ വാദം. പതിറ്റാണ്ടുകളായി വിദേശ വിദ്യാർത്ഥികൾക്ക് അനിശ്ചിതകാലത്തേക്ക് യുഎസിൽ തുടരാൻ കഴിഞ്ഞിരുന്നുവെന്നും, രാജ്യം വിടാതിരിക്കാൻ പലരും തുടർച്ചയായി കോഴ്സുകളിൽ ചേരുന്ന രീതി ഇതിലൂടെ പ്രതിരോധിക്കാൻ സാധിക്കുമെന്നും ഡിഎച്ച്എസ് സെക്രട്ടറി മാർക്ക്വെയ്ൻ മുള്ളിൻ പറഞ്ഞു. മുൻ നിയമപ്രകാരം യുഎസിൽ കഴിയുന്ന നിലവിലെ വിസ ഉടമകളും ഈ പുതിയ സംവിധാനത്തിലേക്ക് ഓട്ടോമാറ്റിക്കായി മാറേണ്ടി വരും.
പുതിയ നിയമം എഫ്-1 വിദ്യാർത്ഥികൾക്ക് കോഴ്സിന് ശേഷമുള്ള ഒപ്ഷണൽ പ്രാക്ടിക്കൽ ട്രെയിനിംഗിനെയും (OPT) ബാധിക്കുമെന്ന് മുംബൈ ആസ്ഥാനമായുള്ള ഇമിഗ്രേഷൻ അഭിഭാഷക സുരഭി സിംഗ് പറയുന്നു. ഒപ്റ്റി (OPT) പദ്ധതി യുഎസ് സർക്കാർ നിർത്തലാക്കിയിട്ടില്ല. വിദ്യാർത്ഥികൾക്ക് നിലവിലുള്ള 12 മാസത്തെ ഒപ്റ്റിക്കും സ്റ്റെം (STEM) ബിരുദധാരികൾക്ക് 24 മാസത്തെ ഒപ്റ്റി നീട്ടലിനും അർഹതയുണ്ടായിരിക്കും. എങ്കിലും, അനുവദിച്ച നാല് വർഷത്തെ കാലാവധി ഒപ്റ്റി കാലയളവിനിടയിൽ അവസാനിച്ചാൽ വിദ്യാർത്ഥികൾ വിസ കാലാവധി നീട്ടിയെടുക്കാൻ പ്രത്യേകം ശ്രദ്ധിക്കേണ്ടി വരും. ഒപ്റ്റി അപേക്ഷകൾക്കായി വിദ്യാർത്ഥികൾ യുഎസ് വിട്ടുപോകേണ്ടി വരുമെന്ന് നിലവിൽ സൂചനകളില്ലെങ്കിലും ഭാവിയിലെ ഡിഎച്ച്എസ്/യുഎസ്സിഐഎസ് നിർദ്ദേശങ്ങൾക്കനുസരിച്ച് മാത്രമേ കാര്യങ്ങളിൽ പൂർണ്ണ വ്യക്തത വരൂ.
ഇന്ത്യൻ വിദ്യാർത്ഥികൾ ഉൾപ്പെടെയുള്ള നിലവിലുള്ള അന്താരാഷ്ട്ര വിദ്യാർത്ഥികളെ ഇത് എങ്ങനെ ബാധിക്കുമെന്ന് ന്യൂയോർക്കിലെ ഒരു ഇമിഗ്രേഷൻ അറ്റോർണി വിശദീകരിച്ചു. പുതിയ നിയമം പ്രാബല്യത്തിൽ വരുമ്പോൾ ഒപ്റ്റി (OPT) അല്ലെങ്കിൽ സ്റ്റെം ഒപ്റ്റി (STEM OPT) അപേക്ഷകൾ സമർപ്പിച്ചിട്ടുള്ളവരോ, അല്ലെങ്കിൽ നിയമം വന്ന് ആറ് മാസത്തിനകം അപേക്ഷിക്കുന്നവരോ ആയ നിലവിലെ എഫ്-1 വിസക്കാർക്ക് തൽക്കാലം പ്രത്യേക വിസ നീട്ടൽ അപേക്ഷ നൽകേണ്ടി വരില്ല എന്നാണ് സൂചന. എങ്കിലും, അന്താരാഷ്ട്ര വിദ്യാർത്ഥികളുടെ പ്രിയപ്പെട്ട കേന്ദ്രമെന്ന യുഎസിന്റെ പദവിയെയും ലോകമെമ്പാടുമുള്ള പ്രതിഭകളെ ആകർഷിക്കാനുള്ള രാജ്യത്തിന്റെ ശേഷിയെയും ഈ പുതിയ നയം ദോഷകരമായി ബാധിക്കുമെന്ന് പല യുഎസ് അഭിഭാഷകരും ആശങ്ക പ്രകടിപ്പിക്കുന്നു.
വരാനിരിക്കുന്ന ഫാൾ (Fall) അഡ്മിഷനുകളെ ഈ വിസ നിയമങ്ങൾ തടസ്സപ്പെടുത്തില്ലെന്ന് വിദഗ്ദ്ധർ കരുതുന്നുണ്ടെങ്കിലും, പുതിയ വിദ്യാർത്ഥികൾക്ക് ഇത് വലിയ ഭരണപരമായ വെല്ലുവിളികളും അനിശ്ചിതത്വവും സൃഷ്ടിക്കും. ഈ പുതിയ നിയമം സെപ്റ്റംബർ 15 മുതൽ പ്രാബല്യത്തിൽ വരും. ഈ നയമാറ്റത്തിലൂടെ സർവകലാശാല ജീവനക്കാരുടെ മേൽനോട്ട ചുമതലകൾ ഫെഡറൽ അധികാരികളിലേക്ക് മാറുമെന്നും അപേക്ഷകർ ബയോമെട്രിക് പരിശോധനകൾക്കും പശ്ചാത്തല പരിശോധനകൾക്കും വിധേയരാകേണ്ടി വരുമെന്നും ഡിഎച്ച്എസ് അറിയിച്ചു.
