അമേരിക്കന് ക്നാനായ റീജിയണിലെ കുട്ടികള്ക്കായി ചെറുപുഷ്പ മിഷന് ലീഗ് (സിഎംഎല്) ക്നാനായ റീജിയണല് കമ്മിറ്റി സംഘടിപ്പിച്ച ‘മാര്ത്തോമന്’ ക്നാനായ പാട്ട് മത്സരത്തില് ന്യൂയോര്ക്കിലെ സെൻ്റ് സ്റ്റീഫന്സ് ക്നാനായ കത്തോലിക്കാ ഫൊറോന പള്ളി ഒന്നാം സ്ഥാനം നേടി. ടാമ്പാ സേക്രഡ് ഹാര്ട്ട് ക്നാനായ കത്തോലിക്കാ ഫൊറോന പള്ളി രണ്ടാം സ്ഥാനവും ഓര്ലാണ്ടോ സെൻ്റ് സ്റ്റീഫന്സ് ക്നാനായ കത്തോലിക്കാ പള്ളി മൂന്നാം സ്ഥാനവും കരസ്ഥമാക്കി. ക്നാനായ സമുദായത്തിന്റെ പാരമ്പര്യഗാനമായ ‘മാര്ത്തോമന് നന്മയാല് ഒന്ന് തുടങ്ങുന്നു’ എന്ന ഗാനം ആലപിച്ച് വിഡിയോ രൂപത്തില് സമര്പ്പിക്കണമെന്നതായിരുന്നു മത്സരത്തിന്റെ നിര്ദേശം. ക്നാനായ വിവാഹാചാരങ്ങളുമായി അഭേദ്യമായി ബന്ധപ്പെട്ട ഈ ഗാനം തലമുറകളായി സമൂഹത്തില് ആലപിച്ചുവരുന്ന ഗാനമാണിത്. വിവാഹചടങ്ങുകള്ക്ക് പുറമെ വിവിധ മതപരവും സാംസ്കാരികവുമായ ക്നാനായ ആഘോഷങ്ങളിലും പ്രാര്ത്ഥനാഗാനമായി ഈ ഗാനം ഉപയോഗിച്ചുവരുന്നു.
ജനപ്രീതി നേടിയ വിഡിയോയ്ക്കുള്ള അവാര്ഡുകള് ഡാലസിലെ ക്രൈസ്റ്റ് ദ കിങ് ക്നാനായ കത്തോലിക്കാ പള്ളിക്കും സാക്രമെൻ്റോയിലെ സെൻ്റ് ജോണ് പോള് ക്നാനായ മിഷനും ലഭിച്ചു. വിജയികള്ക്ക് ക്യാഷ് അവാര്ഡ്, ട്രോഫി, സര്ട്ടിഫിക്കറ്റ് എന്നിവ സമ്മാനിക്കും.
