പ്രവിശ്യയിലെ സ്വകാര്യ ഓൺലൈൻ ചൂതാട്ട, കായിക ബെറ്റിംഗ് സൈറ്റുകൾക്ക് പ്രവർത്തനാനുമതി നൽകി ആൽബർട്ട സർക്കാർ. പ്രവിശ്യയുടെ പുതിയ ‘ഐഗെയിമിംഗ് ആക്ട്’ പ്രകാരം ജൂലൈ 13 തിങ്കളാഴ്ച മുതൽ പുതിയ നിയമം പ്രാബല്യത്തിൽ വന്നു. ഇതോടെ കാനഡയിൽ വാണിജ്യാടിസ്ഥാനത്തിലുള്ള ഓൺലൈൻ ചൂതാട്ട പ്ലാറ്റ്ഫോമുകൾക്ക് നിയമപരമായ അനുമതി നൽകുന്ന രണ്ടാമത്തെ പ്രവിശ്യയായി ആൽബർട്ട മാറി. ഒൻ്റാരിയോയാണ് ഇതിന് മുമ്പ് ഈ അനുമതി നൽകിയ പ്രവിശ്യ. അനധികൃത ‘ഗ്രേ മാർക്കറ്റിനെ’ ഇല്ലാതാക്കുക, നികുതി വരുമാനം വർധിപ്പിക്കുക എന്നതാണ് ഈ നടപടിയിലൂടെ സർക്കാർ ലക്ഷ്യം വെക്കുന്നത്.
പുതിയ നിയമം പ്രാബല്യത്തിൽ വരുന്നതോടെ ആൽബർട്ടയിലെ ജനങ്ങൾക്ക് ലോകപ്രശസ്തമായ ചൂതാട്ട സൈറ്റുകളിൽ ഇനി മുതൽ നിയമപരമായി പന്തയം വയ്ക്കാൻ സാധിക്കും. ഒപ്പം, ചൂതാട്ട ആസക്തി തടയുന്നതിനായി എല്ലാ അംഗീകൃത പ്ലാറ്റ്ഫോമുകളിൽ നിന്നും ഉപഭോക്താക്കൾക്ക് സ്വയം വിലക്കേർപ്പെടുത്താൻ സാധിക്കുന്ന പ്രവിശ്യാതല ‘സെൽഫ് എക്സ്ക്ലൂഷൻ’ സംവിധാനവും സർക്കാർ ഒരുക്കിയിട്ടുണ്ട്. ചൂതാട്ട പരസ്യങ്ങൾക്കും കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്. കായികതാരങ്ങളെ ഉപയോഗിച്ച് പ്രത്യേക ബെറ്റിംഗുകളോ ഗെയിമുകളോ പ്രോത്സാഹിപ്പിക്കാൻ പാടില്ലെന്നും, ഉത്തരവാദിത്തമുള്ള ചൂതാട്ട ശീലങ്ങളെ കുറിച്ച് ബോധവൽക്കരിക്കുന്ന പരസ്യങ്ങളിൽ മാത്രമേ താരങ്ങൾക്ക് പ്രത്യക്ഷപ്പെടാനാകൂ എന്നും അധികൃതർ വ്യക്തമാക്കി.
സ്വകാര്യ ഓപ്പറേറ്റർമാരുടെ ലാഭത്തിൻ്റെ 20 ശതമാനമാണ് പ്രവിശ്യാ സർക്കാർ നികുതിയായി ഈടാക്കുക. ഇതിൽ ആകെ വരുമാനത്തിൻ്റെ രണ്ട് ശതമാനം ആൽബർട്ടയിലെ ഗോത്രവർഗ്ഗ വിഭാഗങ്ങൾക്ക് ഉറപ്പാക്കിയിട്ടുണ്ട്. പ്രവിശ്യയുടെ ഔദ്യോഗിക ഗെയിമിംഗ് സൈറ്റായ ‘പ്ലേ ആൽബർട്ട’ 2025-ൽ 269 ദശലക്ഷം ഡോളർ വരുമാനം ഉണ്ടാക്കിയപ്പോൾ, ഒൻ്റാരിയോ 2.9 ബില്യൺ ഡോളറാണ് നേടിയത്. ഈ പുതിയ നയത്തിലൂടെ വലിയ സാമ്പത്തിക നേട്ടമുണ്ടാകുമെന്നാണ് ആൽബർട്ട ഭരണകൂടം പ്രതീക്ഷിക്കുന്നത്.
